BIRNA OG ARNAR UNNU TIL TVEGGJA VERÐLAUNA Á FÍT VERÐLAUNAHÁTÍÐINNI

Birna Geirfinnsdóttir og Arnar Freyr Guðmundsson unnu tvenn gullverðlaun á verðlaunaafhendingu Félags Íslenskra teiknara (FÍT).

Verðlaunaafhendingin fór fram föstudaginn 22. mars í Grósku og unnu Birna og Arnar gullverðlaun bæði fyrir bókarhönnun og bókarkápuna á bókinni Art can heal eftir Ágústu Oddsdóttur.

Birna er prófessor í grafískri hönnun og Arnar Freyr er stundakennari í grafískri hönnun við Listaháskóla Íslands, saman reka þau hönnunarstofuna Studio Studio.

Í umsögn dómnefndar um bókarkápuna segir:

„Frumleg hugmynd, ást við fyrstu sýn. Falleg myndbygging og sniðug týpógrafía. Fullkomið kaos. Snjöll útfærsla og gott jafnvægi. Allt situr vel og hefur sinn stað. Vandað yfirbragð að öllu leyti“

Í umsögn dómnefndar um hönnun bókarinnar segir:

„Framúrskarandi verk sem gerir gripinn eftirsóknarverðan og eigulegan. Textinn er læsilegur. Skemmtilegar myndir njóta sín vel, einstaklega góð prentun og týpógrafía til fyrirmyndar“

Nýútskrifaðir nemendur Listaháskólans fóru einnig heim með verðlaun af hátíðinni. Elís Gunnarsdóttir fékk gullverðlaun í nemendaflokki fyrir útskriftarverkefnið sitt, Polar Display.

Í umsögn dómnefndar segir:

„Tæknilega og hugmyndalega framúrstefnulegt. Ákaflega vel útfært og vönduð framsetning. Hér er reynt á þolmörk leturverkfræðinnar. Fagleg vinnubrögð.“

Þá fékk Hugi Ólafsson sifurverðlaun í sama flokki fyrir útskriftarverkefnið sitt, 13/04/2023 00:00-23:59 64.141793°/64.14179° -21.912035°/-21.91203° 27W 455618 7113133. 

Í umsögn dómnefndar segir:

„Hugmyndin tekin alla leið. Verkefnið er ekki unnið inn í bókarformið hefur fær viðfangsefnið að ráða. Hugmyndin tekur útfærsluna yfir öll skynsemismörk og útkoman er einstök og heilsteypt.“

FÍT verðlaunin eru fagverðlaun og hlutverk þeirra er að finna það sem skarar fram úr í grafískri hönnun og myndlýsingum á Íslandi ár hvert.

Hægt er að lesa allt um FÍT verðlaunaafhendinguna hér. 

Listaháskóli Íslands óskar öllum verðlaunahöfum til hamingju.