Kirkjutónlist BA

Information is provided in Icelandic for study programmes that have Icelandic as the primary language of instruction.

Um námið

Námsleið í kirkjutónlist er samstarf tónlistardeildar LHÍ og Tónskóla Þjóðkirkjunnar. Markmið námsleiðarinnar er að nemendur öðlist staðgóða þekkingu, leikni og hæfni í öllu því mikilvægasta er lýtur að starfi hljóðfæraleikara og kórstjóra í kirkjum. Námið gerir miklar kröfur til nemenda, það er framsækið, krefst sjálfstæðis í vinnubrögðum og er góður grunnur fyrir kantora framtíðarinnar se mog fyrir framhaldsnám til meistaragráðu í kirkjutónlist í erlendum háskólum. Þrátt fyrir að námið sé tengt hefðbundnu kirkjustarfi er það jáfnframt persónulegt og einstaklingsmiðað. Þannig er miðað að því að nemandinn þrói með sér innsæi og persónulegan stíl í túlkun sinni á hvers kyns kirkjulegri tónlist. Þá stendur nemendum til boða að bæta við sig valnámskeiðum á fjölbreyttu sviði hljóðfæraleiks og fræða sem opnar þá fyrir möguleikann á að breikka starfssvið sitt enn frekar að námi loknu. 

Uppbygging náms

Námið er þriggja ára bakkalárnám (BMus). Nemendur sækja tíma í orgelleik, lítúrgiskum orgelleik og kórstjórn bæði í einkatímum og í hóptímum hjá framúrskarandi listamönnum, innlendum sem erlendum.  Boðið er upp á önnur námskeið sem gefa góðan grunn fyrir kantorsstarf í kirkjum, svo sem sálma- og helgisiðafræði, orgelfræði, söng, hljómborðsleik o.fl. Kammertónlist, samspil og reglulegt tónleikahald er mikilvægur hluti námsins. Samstarf við margra erlenda tónlistarháskóla opnar nemendum góða möguleika fyrir skiptinám erlendis. Almenn fræðafög eru um þriðjungur námsins.  

Að loknu námi

Að loknu námi hafa nemendur náð valdi á helstu atriðum sem tengjast kirkjutónlistarstarfi. Þá veitir námið góða undirstöðu fyrir áframhaldandi nám í hljóðfæraleik á meistarastigi við erlenda tónlistarháskóla. Þeir nemendur sem hyggjast einbeita sér að kennslu eiga jafnframt greiðan aðgang meistaranámi við LHÍ í kennslufræði (M.Ed).