Í dag, þriðjudaginn 4. desember kl. 13:00, verður undirritaður samningur á milli skólans og byggingafélagsins Samson Properties ehf. um um nýbyggingu fyrir Listaháskólann á Frakkastígsreit. Af því tilefni verður felld niður kennsla í skólanum frá kl. 12:30 til kl. 14:00. Skrifstofur skólans verða lokaðar á sama tíma og bókasafn.

Undirritunin fer fram í tónlistarsal skólans, Sölvhól, við Sölvhólsgötu (gengið inn frá horni Klapparstígs og Skúlagötu). Fyrir hönd Listaháskólans undirritar rektor samninginn og Sveinn Björnsson, framkvæmdastjóri, fyrir hönd byggingafélagsins. Við undirritunina flytur menntamálaráðherra ávarp og borgarstjóri flytur kveðjur borgarinnar.

Rútur ganga frá Skipholti og Laugarnesi upp úr kl. 12:30 og til baka aftur fyrir kl. 14:00.

Nýsköpunarverkefnið Stefnumót bænda og hönnuða hefur hlotið styrk frá Tækniþróunarsjóði. Verkefninu er stýrt af Sigríði Sigurjónsdóttur, prófessor í vöruhönnun við hönnunar- og arkítektúrdeild LHÍ. Um er að ræða stuðning í þrjú ár, samtals tæpar 17 milljónir. Stefnumót bænda og hönnuða er frumkvöðlaverkefni í þágu atvinnulífsins þar sem tvær starfstéttir leiða saman hesta sína til að skapa einstakar afurðir. Mikil sóknarfæri felast í matvælaframleiðslu á Íslandi og með markvissri nýsköpun á hráefninu er hægt að margfalda virðisaukann. Í sérstöðu og upplifun felast mikil verðmæti og er athöfnin ?að borða? orðin ein sú veigamesta í nútíma upplifunarsamfélagi. Því er markmið verkefnisins að þróa héraðsbundnar matvörur byggðar á hæstu gæðum, rekjanleika og menningarlegri skírskotun. Nýnæmi verkefnisins felst í samstarfi hönnunarnema við LHÍ og bænda.
Slíkt samstarf hefur ekki átt sér stað áður á Íslandi og ekki er vitað til þess að það hafi átt sér stað í öðrum löndum með svo beinskeyttum hætti. Hér er á ferðinni mikið frumkvöðlastarf sem getur haft verulegt fordæmisgildi í framtíðinni, en í verkefninu er einni af elstu starfstéttum landsins, bændum, telft saman við eina af yngstu starfsstéttunum, hönnuðum. Markmiðið er að þær afurðir sem verða þróaðar á næstu 3 árum skapi efnahagslegan ávinning og verði fyrirmyndir fyrir aðra bændur til að auka vægi nýsköpunar í framleiðslunni. Í litlu samfélagi eins og Íslandi eru fyrirmyndir mjög líklegar til að hafa margföldunaráhrif og við það styrkist samkeppnisstaða íslensks landbúnaðar verulega.

Verkefnið er unnið í samstarfi við hönnunarþjónustuna Borðið, verkefnið Beint frá býli, veitingastaðinn Friðrik V á Akureyri og samstarfsaðila í Central Saint Martins háskólanum í London.

Nánari upplýsingar gefur verkefnisstjóri, s. 699 1090, netfang: sigridur@lhi.is

Myndin sýnir Skyrkonfekt sem hönnunarnemar LHÍ unnu í samvinnu við bóndann á Erpsstöðum, 2007