Íranska listakonan Shirin Neshat fjallar um eigin verk

Íranska listakonan Shirin Neshat fjallar um eigin verk á fyrirlestri Opna Listaháskólans föstudaginn 26. september kl. 1130 í myndlistardeild Listaháskóla Íslands, Laugarnesvegi 91, stofu 024.

Íranska listakonan Shirin Neshat hefur um árabil verið í fremstu röð listamanna sem nota myndbönd til að tjá óvenjulega gagnrýni sína á íranskt samfélag. Bann við söng kvenna og sú staðreynd að geðsjúkar konur þurfa ekki að hylja hár sitt eru dæmi um vökult auga hennar fyrir sérkennum ríkjandi skipulags, sem hún átelur fyrir tvískinnung í kynjamálum.

Neshat hefur verið búsett í New York um árabil og vinnur nú að sinni fyrstu kvikmynd. Vídeóverk eftir hana verða á sýningu á Listasafni Íslands sem opnar 25. september. Sýningin er skipulögð í nánum tengslum við Alþjóðlegu kvikmyndahátíðina í Reykjavík (RIFF) og kemur listakonan til landsins að því tilefni.

Sláturterta og rabarbarakaramella

MÁ BJÓÐA ÞÉR SLÁTURTERTU OG RABARBARAKARAMELLU?

VÍSINDAKAFFI FIMMTUDAGINN 25. SEPTEMBER KL. 20:00 Í HAFNARHÚSI


Á fimmtudagskvöldið kl. 20:00 verður boðið upp á stefnumót hönnuða og bænda. það er hluti af röð viðburða undir heitinu Vísindakaffi sem er aðdragandi að hinni árvissu Vísindavöku Rannís.

Nemendur og kennarar í vöruhönnun við Listaháskóla Íslands hafa unnið í samstarfi við Matís ohf. og landsliðskokkanna Gunnar Karl Grétarsson og Örvar Birgisson að þróun nýrra afurða fyrir íslenska bændur. Markmið verkefnisins er að auka virði afurðanna og stuðla að nýsköpun í íslenskum landbúnaði.

Fyrsta uppskera verkefnisins leit dagsins ljós nú í haust, sláturtertan, sem fáanleg verður næsta sumar á veitingastaðnum Fjalladýrð í Möðrudal á Fjöllum, og rababarakaramellan sem fáanleg verður í sérverslunum og beint frá bænum Löngumýri á Skeiðum.

Þeir sem taka þátt í spjallinu eru:
Sigríður Sigurjónsdóttir, prófessor í vöruhönnun við Listaháskóla Íslands
Brynhildur Pálsdóttir, vöruhönnuður
Guðmundur H. Gunnarsson, deildarstjóri hjá Matís
Irek Klonowski, landbúnaðarverkfræðingur hjá Matís

Aðgangur ókeypis

Kynningarfundir fyrir almenning um nýbyggingu Listaháskólans

Á annað hundrað manns sóttu kynningarfundi fyrir almenning um nýbyggingu Listaháskólans!

Starfsemi Listaháskóla Íslands og vinningstillaga í samkeppni um nýtt hús skólans á Laugavegi voru kynnt á opnum kynningarfundum fyrir almenning í Regnboganum á laugardag, 13.september s.l.

Hjálmar H. Ragnarsson rektor Listaháskólans, Jóhannes Þórðarson deildarforseti hönnunar-og arkitektúrdeildar skólans og Páll Hjaltason hjá +Arkitektum sáu um kynninguna.

Á annað hundrað manns sóttu fundina en markmiðið var að gefa sem flestum kost á að rýna í vinningstillöguna.

Að kynningu lokinni sköpuðust ítarlegar umræður um nýbygginguna og staðsetningu hennar. Flestir lýstu yfir mikilli ánægju með kynninguna og tillöguna þó sumir hefðu áhyggjur af stærð skólans, bílastæðamálum og aðkomu.

Punktar frá fundinum:

Logi í Vínberinu taldi að húsið yrði mikil lyftistöng fyrir Laugveginn en á þessum reit hefði ekkert mátt byggja í þrjátíu ár. Hilmar Einarsson hjá Morkinskinnu tók í sama streng. Sagðist hafa fylgst með þessum reit í áratugi og fagnaði því að nú ætti að koma starfsemi á reitinn. Sama sagði Pétur Arason sem vonaðist til að sjá skólann rísa þarna sem fyrst.

Guðrún Jóhannsdóttir í Kokku lýsti yfir mikilli ánægju með hugmyndina. Hún spurði um framkvæmdarhraða og hvenær húsið yrði tilbúið.

Bjarni Daníelsson fyrrverandi óperustjóri greindi frá því að á sínum tíma hefði honum þótt Laugarnesið vera ákjósanlegur staður fyrir Listaháskólann og hefði hann sem skólastjóri MHÍ unnið að því að skólanum yrði fundinn þar staður. Nú sæi hann að staðsetningin væri gríðarlega mikilvæg bæði fyrir skólann og Reykjavíkurborg og vonaðist hann til að byrjað verði sem fyrst að byggja.

Júlíana Gottskálksdóttir listfræðingur hjá Húsafriðunarnefnd kvartaði yfir stærðum tiltekinna eininga og var á því að skólinn hefði átt að vera í Vatnsmýri í nálægð við Háskóla Íslands.

Einar Ólafsson arkitekt hrósaði tillögunni og taldi hana hafa verið þá langbestu í samkeppninni.

Ólafur F. Magnússon borgarfulltrúi og fyrrverandi borgarstjóri tók virkan þátt í umræðunum. Hann lýsti yfir furðu sinni á því að ekki hefðu fleiri borgarfulltrúar mætt á kynninguna.

Baldur Símonarson dósent í lífefnafræði við H.Í spurðist fyrir um stækkunarmöguleika skólans og um meiri nýtingu á Hverfisgötureitnum. Rektor svaraði því til að nýbyggingin geri nú þegar ráð fyrir nemendum í meistaranámi og ljósmyndanámi. Þá megi gera ráð fyrir stækkun í nærliggjandi hús (Regnbogann o.s.frv.) og nýtingu húsa á Hverfisgötureit auk annarra húsa í nágrenninu líkt og sambærilegir skólar gera erlendis.

Í lokin spunnust umræður um samgöngumál. Einn sem starfað hafði í miðborginni hafði áhyggjur af því að þetta svæði þyldi ekki svona margt fólk án þess að því fylgdu fleiri bílastæði. Kári Halldór Þórsson íbúi í miðborginni sagði að íbúar hefðu verið að flýja miðborgina þar sem vantar heildarstefnu í samgöngu-og skipulagsmálum. Sérstaklega gagnrýndi Kári skipulag sem mótaðist af “bútasaumi”. Annar íbúi í miðborginni benti á að það væri fagnaðarefni að ekki væri gert ráð fyrir að allir nemendur og starfsmenn skólans kæmu á bílum. Það væri gott fordæmi.

Á sama máli var Hrafnkell Birgisson vöruhönnuður en hann óskaði eftir samkeppni á heildarlausnum í samgöngumálum Reykvíkinga. Taldi bílastæðamál tengd nýbyggingu Listaháskólans ekki vera vandamál að þessu leyti. Ætti frekar að vera hvatning til að menn færu að leita að heildstæðum lausnum um samgöngumál miðborgarinnar.

Rektor greindi frá því að tillagan hefði auk þess verið kynnt á ýmsum fundum með félagasamtökum, íbúasamtökum, fyrir kaupmönnum í miðborginni og fyrir nemendur og starfsmenn skólans.

Landnám Ingólfs og móðir jörð

Þórarinn Þórarinsson arkitekt heldur fyrirlestur í Opna Listaháskólanum þriðjudaginn 23. september kl. 12.00 í Skipholti, stofu 113.

Í fyrirlestrinum verður gerð tilraun til að varpa ljósi á þá tilgátu að íslenskir landnámsmenn hafi komið hingað til lands með ævaforna þekkingu um eðli tilverunnar, náttúru jarðarinnar og samhengi mannsins í heildar myndinni. Þessi þekking á rætur í arfi sem frá örófi alda reis og hneig á ýmsum menningarsvæðum, var að stofni til sá sami, en birtist í mismunandi myndum eftir menningu og tungumáli hinna ólíkra menningarsvæða og tímaskeiða.

Allt fram á 13. öld voru til á hverjum tíma menn sem þekktu þetta samhengi og varðveittu það með arfsögnum, ljóðum og launhelgum, þar til kirkjan og skólaspekin lögðust á eitt að útrýma hinni fornu speki.

Í sagna arfi okkar Íslendinga virðist vera falinn hlekkur sem tengir saman þessa sundurleitu mynd, sem slitin hefur verið í ótengda frumparta með óljósu samhengi og bjagaðri heimsmynd.

Allir velkomnir - aðgangur ókeypis.

Deildarforseti fyrir listkennslu


Listaháskóli Íslands auglýsir eftir umsóknum um starf deildarforseta fyrir listkennslu.

Listaháskólinn undirbýr stofnun listkennsludeildar á grundvelli þess náms fyrir listkennara sem skólinn hefur rekið undanfarin ár. Umsækjandi um starf deildarforseta skal vera listkennari og hafa meistaragráðu á sínu sviði eða jafngilda þekkingu og reynslu. Deildarforseti tekur við starfi forstöðumanns kennaranáms og undirbýr jafnframt stofnun deildarinnar sem sjálfstæðrar einingar innan skólans. Áætlað er að deildin taki formlega til starfa 1. ágúst 2009.

Um deildarforseta segir í skipulagsskrá skólans:”Yfirstjórn hverrar deildar er falin deildarforseta. Störf deildarforseta skulu auglýst laus til umsóknar til allt að þriggja ára í senn. Rektor ræður deildarforseta að höfðu samráði við stjórn.” Sérstök dómnefnd dæmir um hæfi umsækjenda. Væntanlegur deildarforseti þarf að geta tekið til starfa eigi síðar en 1. janúar 2009.

Umsókn skal fylgja greinargóð skýrsla um störf umsækjanda og menntun. Sérstaklega skal gera grein fyrir kennslustörfum, störfum á sviði lista, rannsóknum og fræðistörfum, reynslu af stjórnun og félagsmálum, og öðrum þeim verkefnum störfum sem gætu varpað ljósi á hæfi umsækjanda til starfsins. Ennfremur skal umsækjandi senda ítarlegt yfirlit um námsferil sinn og leggja fram afrit af prófskírteinum.Umsókninni skal fylgja stutt greinargerð um hugmyndir umsækjanda um uppbyggingu náms í listkennslu. Loks er til þess ætlast að umsækjandi sendi með umsagnir um helstu kennslu- og stjórnunarstörf eftir því sem við á.

Umsóknir skulu stílaðar á rektor og skal skila þeim ásamt með fylgigögnum til Listaháskóla Íslands, aðalskrifstofu Skipholti 1, 105 Reykjavík, eigi síðar en mánudaginn 22. september n.k. Farið verður með umsóknir sem trúnaðarmál. Öllum umsóknum verður svarað og umsækjendum tilkynnt um ráðstöfun starfsins þegar ákvörðun hefur verið tekin. Sjá nánar um reglur um veitingu akademískra starfa við Listaháskólann.

« Previous Page — Next Page »