Rektor Listaháskóla Íslands hefur ráðið Kristínu Valsdóttur, tónmenntakennara í stöðu deildarforseta listkennsludeildar en deildin verður stofnuð formlega 1. ágúst n.k. Tíu umsækjendur voru um starfið. Sérstök dómnefnd skipuð af stjórn skólans mat sex þeirra hæfa, þar af þrjá vel hæfa til að gegna starfinu miðað við starfsvið og skyldur eins og starfið var auglýst af hendi skólans.

Kristín Valsdóttir lauk B.Ed. prófi frá Kennaraháskóla Íslands 1985, með kjörsviði í tónmenntum og hefur frá þeirri útskrift beint sjónum sínum að eflingu tónlistarkennslu í grunnskólum. Hún hefur lagt stund á nám í píanói, söng og altblokkflautu. Á árunum 1990-1992 var hún í framhaldsnámi á sviði tónlistar-og hreyfikennslu við Orff Institut, Mozarteum í Salzburg. Árið 2006 lauk Kristín M.Ed. prófi í uppeldis-og kennslufræðum frá Kennaraháskóla Íslands.

Kristín hefur m.a. kennt við Tónlistarskólann í Reykjavík, Tónlistarskóla Kópavogs, Leiklistarskóla Íslands, Vesturbæjarskólann í Reykjavík og við Listaháskólann. Auk þess stofnaði hún og stjórnaði Barna-og unglingakór Dómkirkjunnar frá árinu 2001-2007. Frá 2003 hefur hún verið verið aðjúnkt við Kennaraháskóla Íslands. Hún hefur setið í ýmsum stjórnum og starfshópum. Hún sat í stjórn Tónmenntakennarafélags Íslands í ellefu ár, í stjórn Tónlist fyrir alla, tekið þátt í eflingu endurmenntunar fyrir tónmenntakennara með árlegu námskeiðshaldi og gefið út námsefni fyrir tónmenntakennara. Frá árinu 2007 hefur Kristín unnið að langtímarannsókn meðal þeirra sem útskriftast með kennararéttindi í tónlist og burtfarapróf á hljóðfæri en stunda kennslu. Undanfarin misseri hefur Kristín komið að endurskipulagninu liskennaranáms við Kennaraháskóla Íslands (nú Menntavísindasvið H.Í) og einnig verið í vinnuhópi um listkennaranám á meistarastigi við Listaháskóla

Listkennsla á meistarastigi mun hefjast formlega nú í haust en listkennsludeild verður stofnuð á grunni kennaranáms sem nú er rekið við skólann. Kristín mun vinna að undirbúningi listkennsludeildar á vormisseri en  tekur við starfi deildarforseta listkennsludeildar eins og fyrr segir þann 1. ágúst n.k.

Listaháskólinn er nú með í undirbúningi aðgerðir og verkefni sem sérstaklega beinast að versnandi efnahagsástandi og vaxandi atvinnuleysi. Skólinn vill leggja sitt af mörkum til að bæta úr ástandinu og beinir því sjónum að því að nýta þá þekkingu og reynslu sem nemendur, kennarara og starfsfólk hans búa yfir.

Aðgerðir skólans eru tvenns konar. Annars vegar að opna fyrir nám nú á vormisseri á kennarabraut og taka við nemendum sem hafa byrjað nám annars staðar og geta það ekki áfram vegna breyttra fjárhagsforsenda. Hins vegar eru  sérstök verkefni sem skólinn undirbýr í samvinnu við  aðra háskóla og er ætlað að koma til móts við brýnar þarfir á sviði menntunar og  og nýsköpunar.

Verkefnin þrjú sem skólinn vinnur nú að eru:

a)  Prisma, þverfaglegt nám í samvinnu við Háskólann á Bifröst. Um er að ræða fullt nám í tvo mánuði (febrúar og mars) þar sem heimspeki og listfræðigreinar eru í kjarnanum en fjölmargar aðrar greinar tengjast við, s.s. ímyndarfræði, hönnun og tíðarandi, myndmálssaga, aðferðafræði leikhúss, skapandi skrif, arkitektúr og skipulag, mannfræði og markaðsfræði. Rauði þráðurinn er skapandi og gagnrýnin hugsun.

Kennsluskrá er á lokastigi en gert er ráð fyrir allt að 120 nemendum.

b) Vefsvæðið “I am Innovation.” Um er að ræða opinn vettvang (”open source”) fyrir frumkvöðla á grasrótarstigi þar sem menn geta leitt saman krafta sína og þróað verkefni, eins konar stefnumóta-síða við hugmyndaríkt og drífandi fólk. Verkefnið er sprottið upp úr vinnu nemenda hönnunar- og arkitektúrdeildar LHÍ og nemenda viðskiptadeildar HR.

c)  “Hugmyndahús” í samvinnu við Háskólann í Reykjavík. Hugmyndin er að koma upp aðstöðu og grunnbúnaði fyrir einstaklinga og hópa sem vilja vinna verkefni sín á sviði nýsköpunar en hafa ekki til þess aðstöðu. Þar verður líka umræðuvettvangur fyrir verkefnin og skólarnir koma með innlegg og kynningar á breiðu sviði nýsköpunar. Stefnt er að því að opna þetta hús fljótlega upp úr áramótum.

Umsóknarfrestur um kennaranám fyrir listamenn í LHÍ rann út í síðustu viku. Alls bárust 47 umsóknir sem er langt umfram þann fjölda umsókna sem barst á sama tíma í fyrra. Ljóst er að umsóknir eru nokkru fleiri heldur en skólinn getur orðið við.

Umsækjendur koma úr öllum listgreinum en fjölmennasti hópurinn meðal umsækjenda eru arkitektar, hönnuðir og myndlistarmenn.

Kennaranám Listaháskólans er 60 eininga nám sem miðar að því að þjálfa listamenn til kennslu og efla með þeim kunnáttu til að miðla þekkingu sinni og færni. Umsækjendur þurfa að hafa lokið háskólaprófi eða sambærilegu námi í myndlist, hönnun, leiklist eða tónlist. Umsækjendur sem lokið hafa mastersnámi í listgrein og sækjast aðeins eftir kennsluréttindum í framhaldsskóla geta valið 30 eininga nám á einu ári.

Með því að mennta listamenn til kennslustarfa vill skólinn efla hlut lifandi lista í fræðslu og menntun allra landsmanna og auka skilning á gildi skapandi hugsunar í öllu skólastarfi.

Verður unnið hratt úr umsóknum á næstu dögum og tilkynnt um inntöku um miðjan mánuðinn. Það er forstöðumaður og stjórn kennaranámsins sem hafa umsjón með inntökunni.

Tónskáldið Olivier Messiaen hefði orðið 100 ára 10. desember næstkomandi og af því tilefni mun Tinna Þorsteinsdóttir píanóleikari efna til hádegistónleika innan tónlistardeildar Listaháskólans á sjálfan afmælisdaginn. Þar mun hún leika tvær af Fuglabókum Messiaens, þær númer 3 og 5 (Catalogue d´Oiseaux, nr. 3 og 5) og segja frá þeim. Tónleikarnir byrja kl: 12.15 miðvikudaginn 10. desember og eru haldnir í Sölvhóli. Aðgangur er ókeypis.

Catalogue d´Oiseaux eftir Olivier Messiaen

Fuglabækur Olivier Messiaens eru  7 talsins, innihalda 13 tónverk og eru um leið einskonar alfræðirit um fugla í Frakklandi. Form verksins er samhverft þar sem hápunkti er náð í miðjunni eða fjórðu fuglabókinni. Segja má því að bækur þrjú og fimm kallist á efnislega og þannig koll af kolli. Messiaen var mikill fuglafræðingur og fannst sjálfum að með Fuglabókunum hefði hann náð ákveðnum hápunkti fuglatónsmíða sinna. Fuglakatalóginn er gríðarstórt píanóverk og tekur um þrjá tíma í flutningi og segja má að Mesiaen hafi þar skrifað umfangsmesta fuglatónverk sitt. Bækurnar skrifaði hann á árunum 1956-58 fyrir eiginkonu sína, píanóleikarann Yvonne Loriod, sem jafnframt frumflutti verkið. Hvert tónverk bókanna ber heiti söngfugls og fjallar um hann í náttúrulegu umhverfi sínu ásamt öðrum  þeim fuglum sem þar eru. Bækur þrjú og fimm innihalda hvor um sig tvö verk en skapa afar ólíkar stemningar. Þriðja bókin gerist um miðja nótt þar sem myrkrið umlykur náttúruna. Í henni eru aðalhetjurnar Náttuglan og Trjálævirkinn. Í fimmtu bókinni koma hinsvegar Sandlævirkinn og Blæsöngvarinn fyrir og gerist hún um vor og sumar og boðar komu ljóss og hita.