Fimmtudaginn 26. mars s.l. var  ný íslensk Sjónabók kynnt í Þjóðminjasafni Íslands en útgáfa hennar er mikill áfangi í sjónmenningu landsins.

Sjónabók er handrit með munstrum sem notuð voru í útsaumi, útvefnaði og til ýmissa hannyrða áður fyrr. Bókin inniheldur safn tíu íslenskra sjónabóka frá 18. og 19. öld, sem eru þær einu sem vitað er að varðveist hafa.

Sjónabókinni er ætlað að vera brunnur hugmynda að nýsköpum með sterkri tilvísun í sérstakan íslenskan menningararf en hönnuður hennar er Birna Geirfinnsdóttir.

Hugmyndina að Sjónabókinni má reka til haustsins 2007, en þá var haldið norrænt Heimilisiðnaðarþing á Íslandi á vegum Heimilisiðnaðarfélags Íslands. Þar var sjónum beint að heimilisiðnaði á Norðurlöndum með áherslu á sérkenni hvers lands. Hugað var að því hvernig menningararfur hverrar þjóðar gæti veitt listamönnum og hönnuðum innblástur.  Hin íslensku sjónabókarhandrit í Þjóðminjasafni Íslands vöktu athygli í þessu samhengi.

Þá kom fram sú hugmynd að gefa út handbók með sjónabókunum í samstarfi Heimilisiðnaðarfélags Íslands, hönnunar- og arkitektúrdeildar Listaháskóla Íslands og Þjóðminjasafns Íslands, sem leiddi til þess að gerður var þríhliða samningur þessara aðila um útgáfu handbókarinnar. Voru munstrin teiknuð upp á rafrænu formi og birtast nú öll saman á bók.

Jean-Philippe Antoine, myndlistarmaður, listgagnrýnandi og  prófessor í fagurfræði og listheimspeki við myndlistardeild Parísarháskóla, París 8, heldur hádegisfyrirlestur á vegum Opna Listaháskólans við myndlistardeild LHÍ, Laugarnesvegi 91, n.k. mánudag, 30. mars k.l 12.30.

Hvað er mynd ?
Sameiginleg einkenni í samtímamyndlist

Listsköpun samtímans felur í sér blöndun margra ólíkra miðla sem gerir það að verkum að erfitt reynist að finna eitt meginlisthugtak yfir samtímalist.  Þegar leitast er við að ná utan um svo fjölbreytilega listsköpun gæti lausnin falist í myndrýninni sjálfri; hvernig skoðum við myndir og greinum.  Í myndum má finna, óháð listmiðli, ákveðið samhengi, s.s. samband við staði og orð. Slík skilgreining gæti ef til vill verið nægilega opin til að rúma svo stórt viðfangsefni sem samtímamyndlist er, en að sama skapi verið kjarnmikil og lýsandi.

Jean-Philippe hefur undanfarin ár skoðað sérstaklega samband myndar og texta með hliðsjón af minningum og samfélagslegum þáttum og var slík rýni m.a. rannsóknarefni í doktorsritgerð hans í París. Meðal ritverka Jean-Philippe má nefna bækur um myndlist Joseph Beuys, Marcel Broodthaers og Gerhard Richters, auk fjölda greina um myndlist sem spanna allt frá tímum miðalda til samtímans. Sem myndlistarmaður hefur hann haldið fjölda sýninga á málverkum, innsetningum og hljóðverkum í Frakklandi, Þýskalandi og Bandaríkjunum, nú síðast  með þátttöku í sýningu Pompidou safnins í París, Moule, Muse, Méduse, árið 2006.

Fyrirlesturinn fer fram á ensku.

Allir eru velkomnir á meðan húsrúm leyfir.

Umsóknarfrestur í myndlistardeild, tónlistardeild og hönnunar-og arkitektúrdeild Listaháskólans fyrir skólaárið 2009-2010 rennur út föstudaginn 27. mars. Í leiklistardeild eru nemendur teknir inn annaðhvert ár á námsbrautirnar leikarabraut, dansbraut, og fræði og framkvæmd. Næst verða teknir inn nemendur þar vorið 2010.

Listaháskóli Íslands sækist eftir hæfileikamiklum og hugmyndaríkum einstaklingum með góða almenna undirstöðumenntun og grunnþekkingu á viðkomandi sviði. Rétt til að sækja um nám hafa þeir sem lokið hafa stúdentsprófi eða sambærilegu námi.

Inntökupróf og viðtöl fara fram í apríl/maí. Haustönn mun hefjast 24. ágúst 2009.

Umsóknir
Grunnumsókn um nám í Listaháskóla Íslands er í stöðluðu rafrænu formi. Önnur umsóknargögn og umsóknarferli eru hins vegar mismunandi eftir deildum skólans. Það er því mjög mikilvægt að umsækjendur lesi upplýsingar um umsóknarferli og fylgigögn frá viðkomandi deild nákvæmlega og fylgi þeim leiðbeiningum sem þar er að finna.

Til að umsókn sé fullgild þurfa eftirfarandi gögn að berast Listaháskólanum:

* Rafræn umsókn
* Prentuð og undirrituð umsókn
* Mynd
* Staðfest afrit af prófskírteinum
* Fylgigögn sem viðkomandi deild óskar eftir

Þegar umsækjendur hafa fyllt út rafræna eyðublaðið, þá þarf að PRENTA umsóknareyðublaðið út, undirrita það, festa á það nýlega passamynd og senda á skrifstofu viðkomandi deildar ásamt öðrum umsóknargögnum sem viðkomandi deild óskar eftir.

Heimilisföng deildarskrifstofa

Skrifstofa hönnunar- og arkitektúrdeildar - Skipholt 1, 105 Reykjavik

Skrifstofa leiklistardeildar og tónlistardeildar - Sölvhólsgata 13, 101 Reykjavík

Skrifstofa myndlistardeildar - Laugarnesvegi 91, 105 Reykjavík

Umsóknafrestur í M.A. nám í Listkennslu er 30. apríl 2009.

Sjá nánar: http://lhi.is/umsoknir/

Opið hús í hönnunar - og arkitektúrdeild Listaháskólans á Hönnunardögum,
26.mars kl.13:00 - 16:00

Opið hús verður í hönnunar-og arkitektúrdeild Listaháskólans á Hönnunardögum en þar er hægt að kynna sér starfsemi deildarinnar sem skiptist í grafíska hönnun, vöruhönnun, fatahönnun og arkitektúr.

Hönnun er í vissum skilningi óáþreifanleg, en er örugglega ótæmandi og sjálfbær. Okkur langar til að opna dyr hönnunardeildar Listaháskólans til að sýna öllum sem áhuga hafa á, að skoða möguleika hönnunar og arkitektúrs til hagsældar fyrir íslenskt samfélag. Þar geta gestir séð hvernig hönnun og arkitektúr samþætta viðskipti og menningu, og kynnst framsækinni hönnun og nýsköpun. Nemendur deildarinnar munu setja fram frumlegar og áhugaverðar tillögur hinna ýmsu verkefna sem þeir hafa tekist á hendur s.l. misseri.

Allir velkomnir

Deildin er til húsa í Skipholti 1, 105 Reykjavík