LÓKAL - alþjóðleg leiklistarhátíð í Reykjavík fer fram helgina 3.-6. september n.k. en Listaháskólinn er einn af samstarfaðilum hátíðarinnar

Hátíðin sem er sú eina sinnar tegundar hérlendis var haldin í fyrsta sinn í mars 2008.  Þá var athyglinni beint að nokkrum atvinnuleikhópum sem hafa verið í fararbroddi í nýsköpun í leiklist í Evrópu og í Bandaríkjunum.

Í ár verður lögð áhersla á að sýna metnaðarfullar íslenskar leiksýningar frá liðnum vetri og því gefst leikhúsáhugafólki kjörið tækifæri til þess að meðtaka á einni helgi nokkuð af því markverðasta sem er á seyði í leiklistarlífi landans.  LEIKFÉLAG REYKJAVÍKUR býður upp á Dauðasyndirnar og Þú ert hér, ÞJÓÐLEIKHÚSIÐ sýnir Utangátta, ÉG OG VINIR MÍNIR sýna Húmanímal og ÁHUGALEIKHÚS ATVINNUMANNA frumsýnir Ódauðlegt verk um stríð og frið auk þess að sýna Ódauðlegt verk um samhengi hlutanna og Ódauðlegt verk um stjórn og stjórnleysi.  Þá verða einnig sýnd þrjú útskriftarverkefni nemenda í Fræði og framkvæmd frá síðastliðnu vori; þeirra Leifs Þorvaldssonar, Ástbjargar Rutar Jónsdóttur og Hlyns Páls Pálssonar.

Erlendir gestir hátíðarinnar koma frá Dublin: FISHAMBLE - NEW PLAY COMPANY sýnir Forgotten eftir Pat Kinevane í leikstjórn Jim Culleton, en leikhúsið hefur ferðast með þessa sýningu um Evrópu og til Bandaríkjanna og hlotið frábærar viðtökur áhorfenda.

Eitt af markmiðum aðstandenda Lókal að þessu sinni er að fá til landsins listræna stjórnendur leiklistarhátíða vestan hafs og austan til þess að kynna þeim íslenskt leikhús.  Útsendarar frá mörgum af virtustu leiklistarhátíðum hafa boðað komu sína, m.a. frá Wiener Festwochen, Dublin Theatre Festival og listahátíðinni Transamerica í Montreal.

Samstarfsaðilar LÓKAL í ár eru:  Menntamálaráðuneytið, Fjárlaganefnd Alþingis, Reykjavíkurborg, Listaháskóli Íslands, Leikfélag Reykjavíkur, Þjóðleikhúsið, Hafnarfjarðarleikhúsið, Leikhúsbatteríið, Iceland Naturally, Nýlistasafnið, Culture Ireland og Nu-trading.

Allar nánari upplýsingar er að finna á heimasíðu hátíðarinnar www.lokal.is

Mary Ellen Mark heldur fyrirlestur í Opna listaháskólanum fimmtudaginn 3.september kl.15.00 í Skipholti 1, stofu 113.  Einnig verður
forsýning á heimildarmyndinni Streetwise eftir Bell eiginmann Mark.

Ljósmyndarinn Mary Ellen Mark sýnir myndir úr nýjustu bók sinni, “Seen Behind the Scene: forty years of photographing on set”. Bókin hefur hlotið frábæra dóma vestra og seldist fyrsta prentun upp. Mark hefur á liðnum áratugum ljósmyndað mikið bak við tjöldin í kvikmyndaheiminum. Einnig sýnir hún nokkrar myndir úr væntanlegri bók um Proms.

Eiginmaðurinn Bell, sem hefur verið tilnefndur til Óskarsverðlauna fyrir heimildamyndina Streetwise, forsýnir einnig þessa 35 mínútna mynd.

Fyrirlesturinn fer fram á ensku og eru allir velkomnir

——————————————————————————————

The photographer Mary Ellen Mark has a lecture at Opni Listaháskólinn, Thursday 3.september at 15:00, at Skipholt 1, room 113.

MARY ELLEN MARK has achieved worldwide visibility through her numerous books, exhibitions and editorial magazine work. Her recent book & exhibition project, Extraordinary Child, was commissioned by The National Museum of Iceland and features photographs of children at two specialized school for the disabled in Reykjavik. Martin Bell also made a film on the same subject which premiered at the exhibition.
She has published sixteen books including extraordinary Child (The National Museum of Iceland, 2007), Seen Behind the Scene (Phaidon, 2009.) Mark’s photographs have been exhibited worldwide.
A photo essay on runaway children in Seattle became the basis of the academy award nominated film STREETWISE, directed and photographed by her husband, Martin Bell. The film will be premiered at the lecture.

The lecture is in english and everyone is welcome

Rektor Listaháskóla Íslands hefur ráðið Sigrúnu Birgisdóttur í stöðu lektors í arkitektúr frá og með 1. ágúst. Ellefu umsækjendur voru um starfið. Þriggja manna dómnefnd skipuð af stjórn skólans mat átta þeirra hæfa til að gegna starfinu miðað við starfssvið og skyldur eins og starfið var auglýst af hendi skólans. Dómnefnd skipuðu þau dr. Jón Ólafsson, prófessor, Margrét Harðardóttir, arkitekt, og Ólafur Tr. Mathiesen, arkitekt.

Sigrún hefur langa reynslu af kennslu á háskólastigi hérlendis og í Bretlandi. Hún var m.a. fagstjóri og háskólakennari við Buckinghamshire Chilterns University College á Englandi þar sem hún vann að uppbyggingu og þróun námsbrautar í rýmishönnun (’Spatial design’). Sigrún hefur sem fagstjóri við Listaháskóla Íslands síðastliðin tvö ár haft leiðandi hlutverk í uppbyggingu náms í arkitektúr við hönnunar- og arkitektúrdeild skólans og tekið þátt í undirbúningi að stofnun meistaranáms í faginu. Þá hefur hún sinnt margvíslegum stjórnunar- og nefndastörfum sem varða arkitektúr og hönnun, og tekið virkan þátt í faglegri umræðu um arkitektúr og nám í arkitektúr.

Verkefni Sigrúnar á sviði arkitektúrs lúta einkum að ýmsum félagslegum þáttum greinarinnar, skipulagi og tengslum borgarmyndar og mannlífs. Hún hefur haldið fyrirlestra um mótun borgarmyndar og áhrif skipulags á félagsgerð borga, og auk þess leitt nokkur mikilvæg verkefni innan deildarinnar með ofangreindum áherslum í samstarfi við opinbera aðila. Sigrún hefur unnið að hönnun mannvirkja, bæði sjálfstætt og í samvinnu við aðra, bæði hér heima og á Englandi þar sem hún starfaði í mörg ár. Þá stendur Sigrún, ásamt Vatnavinum, að rannsókna- og þróunarverkefni sem snýr að því að þróa baðstaði, vötn og vatnasvæði á Íslandi sem aðdráttarafl á heimsvísu tengt náttúru, heilsu, og baðmenningu.

Í sumar hlaut Listaháskóli Íslands styrk úr Leónardó hluta Menntaáætlunar ESB.  Sótt var um styrk í flokknum “ungt fólk á vinnumarkaði” undir heitinu “New skills and training for Artists and Designers”.

Landskrifstofa Leónardó ásamt tveimur erlendum matsmönnum valdi styrkhafa en hópur umsækjenda var stærri en nokkru sinni fyrr. Listaháskólanum var úthlutað rúmlega 22.000 evrum og nú þegar hafa tveir útskrifaðir nemendur skólans hafið starfsþjálfun erlendis í sínu fagi.

Þetta eru þau Sindri Páll Sigurðarson sem útskrifaðist úr vöruhönnun vorið 2008 og Arna Sigrún Haraldsdóttir sem útskrifaðist úr fatahönnun sama ár.  Sindri hlaut styrk uppá 3600 evrur og mun starfa í 16 vikur hjá sportvöruframleiðandanum K1X í München í Þýskalandi.  Á starfsþjálfunartímabili sínu mun Sindri Páll fást við hönnun nýrrar línu skófatnaðar, endurhönnun eldri módela, vinna við markaðssetningu o.fl.  Arna Sigrún hlaut 8 vikna styrk til að starfa hjá fatahönnuðinum Roksanda Ilincic í London.  Roksanda lauk meistaraprófi frá Central Saint Martins og selur vörur sínar í mörgum löndum, m.a. versluninni Kron á Íslandi.  Á starfsþjálfunartímabili sínu mun Arna kynnast daglegum störfum í stúdíó sem starfar á alþjóðavettvangi og hljóta víðtæka þjálfun í faginu.

Fleiri útskrifaðir nemendur skólans hafa nú þegar skrifað undir samning um starfsþjálfunarstyrki og ljóst er að þörfin er mikil.  Það er Listaháskólanum mikilvægt að geta aðstoðað útskrifaða nemendur sína með þessum hætti.  Það er ómetanlegt tækifæri að öðlast starfsreynslu í sínu fagi erlendis og slík þjálfun er sannarlega til góðs.