OPNI LISTAHÁSKÓLINN, hádegisfyrirlestur mánudaginn 12.okt kl 12.30.

Kristín Dagmar Jóhannesdóttir og Klara Þórhallsdóttir fjalla um sjónlistahátíðina Sequences í hádegisfyrirlestri LHÍ Laugarnesi, mánudaginn 12. október kl. 12.30.

Sequences er árleg hátíð sem haldin verður í fjórða sinn daganna 30. október til 7. nóvember en til hennar var stofnað árið 2006 af nokkrum listamannareknum sýningarrýmum í Reykjavík; Nýlistasafninu, Kling og Bang gallerí, Galleríi Dvergi og Banananas, ásamt Kynningarmiðstöð íslenskrar myndlistar, KÍM.

Hátíðin hefur frá upphafi lagt megináherslu á tímatengda myndlist eins og gjörningalist, myndbandalist, hljóðlist og samruna eða samvinnu við aðrar listgreinar og í ár mun megináherslan vera á gjörningalist og sviðslistir. Því verða aðeins lifandi viðburði á hátíðinni að þessi sinni.
Í fyrirlestri sínum n.k. mánudag ætla aðstandendur Sequences 2009 að kynna helstu dagskrárliði hátíðarinnar þau 20 verkefni sem boðið verður upp á að þessu sinni, með aðkomu bæði íslenskra listamanna og erlendra gesta. Þá verður fjallað um hugmyndina að baki Sequences og markmið hátíðarinnar.

Kristín Dagmar Jóhannesdóttir lauk mastersnámi í samtímalistfræði (Contemporary Art Theory) við Edinburgh College of Art í Skotlandi sumarið 2009. Einnig lauk hún BA námi frá Listfræðideild Háskóla Íslands árið 2007 ásamt kynningarnámskeiði í Menningarstjórnun (Art Management) við Sibelius Akademíuna í Finnlandi þar sem hún dvaldi í eitt ár í skiptinámi við Listasögudeild University of Helsinki. Hefur hún fengist við ýmis menningartengd verkefni og má þar nefna sýningar- og ritstjórn útgáfunnar Ten Tails (2009) sem fjallar um stöðu bókverksins í samtímanum, sýningarstjórn If you´ll believe in me I´ll believe in you, (2008) The GRV, Edinburgh. Kristín er listrænn stjórnandi sjónlistahátíðarinnar Sequences 2009.

Klara Þórhallsdóttir lauk B.A námi í myndlist frá Listaháskóla Íslands 2006 og diplómanámi til kennsluréttinda í listkennslu 2007. Eftir nám hefur hún unnið við ýmis fræðslustörf hjá Listasafni Reykjavíkur, haldið námskeið og leiðsagnir um sýningar safnsins, ásamt öðrum menningartengdum verkefnum. Klara er framkvæmdastjóri sjónlistahátíðarinnar Sequences 2009.

Senda á Facebook