Föstudaginn 15. janúar s.l. var haldin miðsvetrarútskrift Listháskóla Íslands. Athöfnin fór fram í Skemmtihúsinu við Laufásveg, en þar voru útskrifaðir sjö nemendur úr hönnunar- og arkitektúrdeild og úr listkennsludeild. Eru það fyrstu nemendur sem útskrifast úr Listkennsludeild eftir stofnun þeirrar deildar.  Þar sem fáir nemendur útskrifuðust að þessu sinni þá var athöfnin látlaus og notaleg. Rektor talaði til útskriftarnema og síðan afhentu deildarforsetar nemendum skírteinin sín.

Þjóðhátíðarsjóður veitir verkefninu Reykjavíkurgötur styrk til að hefja útgáfu

Undanfarin ár hafa nemendur í arkitektúr við Listaháskóla Íslands unnið að rannsóknum á áveðnum götum og borgarrýmum í miðbæ Reykjavíkur, undir handleiðslu Sigrúnar Birgisdóttur, lektor og fagstjóra í arkitektúr og Massimo Santanicchia arkitekts.

Byggingarlist er eitt birtingarform menningar sérhverrar þjóðar. Lifandi borg er breytingum háð, þar sem borgarrýmin og arkitektúr þróast samfara breyttum þörfum og væntingum samfélagsins. Göturannsóknarverkefnin sem hér um ræðir leitast við að skilja þróun byggðar í Reykjavík.

Árið 2008 var Frakkastígur skoðaður, árið 2009 Hverfisgata og árið 2010 verður Lækjargata rannsökuð. Hóprannsókn nemenda hefur falið í sér að kanna hvert og eitt hús og teikna það upp til að varpa fram heildstæðri götumynd, sem og að kanna breytileika félagslegra og umhverfislegra þátta allrar götunnar og umlykjandi byggðar til að varpa frekara ljósi á þróun byggðar í Reykjavík. Göturannsóknirnar hafa verið styrktar af Borgarskipulag Reykjavíkur.

Til að tryggja varðveislu og miðlun þessarar þekkingar er það markmið fagstjóra í arkitektúr að koma á fót nýrri ritröð um þetta efni undir heitinu Reykjavíkurgötur. Hefur nú fengist styrkur til að hrinda af stað þessari ritröð, sem mun marka upphafið að frekari þekkingaröflun og -sköpun á þessu sviði.

Alls bárust 259 umsóknir um styrki að fjárhæð samtals um 350 millj. kr. Úthlutað var að þessu sinni 65 styrkjum að fjárhæð samtals kr. 33,9 millj. kr. Tilgangur Þjóðhátíðarsjóðs er að veita styrki til stofnana og annarra aðila, er hafa það verkefni að vinna að varðveislu og vernd þeirra verðmæta lands og menningar, sem núverandi kynslóð hefur tekið í arf.

Miðsvetrartónleikar tónsmíðanemenda tónlistardeildar voru haldnir voru nú um helgina.  Þar var mikil stemning og mjög góð aðsókn. Var um tvenna tónleika að ræða sem báðir hófust kl. 16.00.

Fyrri tónleikarnir voru laugardaginn 16. janúar og þeir seinni 17. janúar en á tónleikunum voru flutt afar fjölbreytt verk eftir átján tónsmíðanemendur s.s. strengjakvartett, örverk, þjóðlag, stuttmynd og verk fyrir ýmis hljóðfæri svo eitthvað sé nefnt.

Tónleikunum var einnig útvarpað beint á netinu þannig að þeir sem ekki áttu heimangengt voru staddir í öðru landi eða öðrum landshluta gátu einnig notið tónlistarinnar og voru margir sem nýttu sér það.

Tónsmíðanemendur sem áttu verk á tónleikunum eru:

Bergrún Snæbjörnsdóttir, Brynhildur Ingibjörg Oddsdóttir, Hafsteinn Þórólfsson, Vala Gestsdóttir, Skúli Jónsson, Arndís Hreiðarsdóttir, Ingibjörg Erlingsdóttir, Þórunn Gréta Sigurðardóttir, Árni Guðjónsson, Birgit Myschi, Gunnar Karel Másson, Halldór Smárason,  Finnur Karlsson, Kolbeinn Bjarnason, Einar Sverrir Tryggvason, Ingólfur Magnússon, Margrét Kristín Blöndal, Erla Axelsdóttir.

Efnisskrá tónsmíðatónleika laugardaginn 16. janúar kl.16.00 - sjá hér

Efnisskrá tónsmíðatónleika sunnudaginn 17. janúar kl.16.00 - sjá hér

Myndlistartvíeykið Rosen/Wojnar sýnir og segir frá verkefnum sínum í hádegisfyrirlestir Opna listaháskólans, í myndlistardeild Listaháskóla Íslands, Laugarnesvegi 91, n.k. mánudag 18. janúar kl. 12.30.

Myndlist Nikolai von Rosen og Florian Wojnar, sem áður störfuðu saman undir heitinu FUTURE7, spannar mörg svið og jafnvel má segja að snertiflöturinn sjálfur, eða bilið á milli heima, sé ákveðinn hugmyndalegur grunnur fjölbreytilegra verkefna þeirra. Þeir hafa beint sjónum sínum að listheiminum og innviðum hans; galleríum og myndlistarmarkaðinum, útgáfu, sýningarstjórnun, söfnum og söfnurum og skörun myndlistar og arkitektúrs, m.ö.o. hvar við upplifum list og hvaða áhrif umgjörðin hefur á upplifun okkar.  Í verkum Rosen/Wojnar mætir fjölfeldið því einstaka, hópurinn einstaklingnum og frumsköpun því sem fengið hefur verið að láni, eða verið stolið.
Rosen/Wojnar verða gestir Nýlistasafnins á Listahátíð í vor. Þeir búa í Berlín og reka þar vinnustofu en starfa einnig báðir sem aðstoðarprófessorar við lista- og arkitektadeild ETH Tækniháskólans í Zürich. Nánari upplýsingar um listamennina er að finna á heimasíðu þeirra: http://www.rosen-wojnar.de/

Allir velkomnir meðan húsrúm leyfir.