Hinn heimsfrægi spænski gítarleikari Ignacio Rodes verður á Íslandi í byrjun maímánuðar á vegum Listaháskóla Íslands, Erasmus- verkefnisins og spænska konsúlatsins á Íslandi.

Hann mun kenna á opnu Masterklass námskeiði í Sölvhóli, sal Listaháskólans, laugardaginn 1. maí kl. 11.00 - 16.00.

Ignacio Rodes mun svo leika á einleikstónleikum í Þjóðmenningarhúsinu við Hverfisgötu daginn eftir, sunnudaginn 2. maí,  og hefjast tónleikarnir kl. 17.00.  Aðgangur er ókeypis, en tónleikarnir eru samvinnuverkefni ofangreindra aðila og Þjóðmenningarhússins.

Ignacio Rodes hefur unnið til fyrstu verðlauna í fimm alþjóðlegum gítarkeppnum, þ. á m. þeim sem kenndar eru við “Andrés Segovia,”  “Francisco Tárrega” og “José Ramirez.” Hann er almennt talinn einn af fremstu gítarleikurum sinnar kynslóðar í heiminum.

Ignacio fæddist í Alicante á Spáni. Hann hóf gítarnám hjá móður sinni, þá aðeins átta ára gamall. Síðar lærði hann hjá José Tomás í Conservatorio Superior “Oscar Esplá” - tónlistarháskólanum þar í borg og tók jafnframt þátt í námskeiðum hjá David Russell, Manuel Barrueco og John Williams. Frá 1983-1986 var hann við nám í London, en þá hafði hann hlotið styrk frá British Council og spænska menntamálaráðuneytinu til að fullnema sig í endurreisnartónlist og hljóðfæratónlist J. S. Bach.

Hann hélt “debut” - tónleika sína í Wigmore Hall í Lundúnum árið 1986. Síðan hefur hann haldið fjölda tónleika um allan heim, í sölum á borð við Alte Oper (Frankfurt), Alice Tully Hall-Lincoln Center (New York), Performing Art’s Center (San Francisco), Roetke Auditorium (Seattle), Chopin’s Museum (Warsaw), Philharmonic Major Hall (St. Petesburg), Palau de la Música (Barcelona), Auditorio Nacional (Madrid), Patio de los Arrayanes (Alhambra, Granada), Museo Chillida Leku (San Sebastián), Sala Nezahualcoyotl (México), Opera Theatre of Cairo, o.m.fl.

Honum hefur verið boðið að leika á alþjóðlegum tónlistarhátíðum í flestum löndum Evrópu, sem og víða í Bandaríkjunum og Suður-Ameríku, og jafnframt hefur hann kennt Master Class - námskeið í Manhattan School of Music (New York), Guildhall School of Music (London), Bloomington School of Music (Indiana University, USA) og  University of Washington (Seattle, USA) svo fátt eitt sé nefnt. Ignacio Rodes hefur leikið í fjölda evrópskra og bandarískra útvarps- og sjónvarpsstöðva.

Hann hefur komið fram sem einleikari með English Chamber Orchestra, Belgrade Philharmonic Orchestra, Orquesta Simfonica de Barcelona i Nacional de Catalunya, Joven Orquesta Nacional de Espana, Hartford Simphony Orchestra, Theatre Hermitage’s Camerata of St. Petesburg, Orchestre de Picardie, Real Filarmonía de Galicia, Orquesta Sinfónica de Madrid, etc. Þá hefur hann leikið inn á fimm geisladiska sem gefnir hafa verið út í Lundúnum, sá síðasti hjá hinu virta  útgáfufyrirtæki EMI Classics.

Ignacio Rodes hefur hvarvetna hlotið einróma lof gagnrýnenda fyrir leik sinn.

Útskriftartónleikar tónlistardeildar Listaháskóla Íslands

Elva Lind Þorsteinsdóttir, flauta

Mánudagur 3. maí  kl. 20.00

Mánudaginn 3. maí kl. 20.00 heldur Elva Lind Þorsteinsdóttir, flautuleikari útskriftartónleika sína í Aðventistakirkjunni Ingólfsstræti, en hún útskrifast með B-mus gráðu frá tónlistardeild Listaháskólans í vor.  Á efnisskrá eru m.a. verk eftir Jean-Marie Leclair, Johann Sebastian Bach, Henri Dutilleux, Ian Clarke og Carl Reinecke.

Meðleikarar á tónleikunum eru Richard Simm, píanó - Elísabet Einarsdóttir, söngur - Ísak Ríkharðsson, fiðla - Chrissie Telma Guðmundsdóttir, fiðla - Sigríður Mjöll Björnsdóttir, víóla og Geirþrúður Guðmundsdóttir, selló.

Nánari efnisskrá tónleikanna er að finna á: http://lhi.is/2010/04/16/utskriftartonleikar-tonlistardeildar-listahaskola-islands-fra-17-april-30-mai-2010/

———

Nú í vor útskrifar tónlistardeild Listaháskóla Íslands tuttugu og fimm nemendur en það er stærsti útskriftarhópur deildarinnar til þessa. Útskriftartónleikarnir eru í það heila tuttugu og tveir og standa til 30. maí n.k. Þar verða m.a. flutt ný verk eftir tónsmíðanemendur auk þess sem fram koma einleikarar á selló, harmóníku, píanó, flautu, gítar, orgel og þrír söngvarar. Þá verður einn fræðifyrirlestur.

Sýningarstjóraspjall á útskriftarsýningu Listháskóla Íslands - sunnudaginn 2. maí kl. 15.00

Fleiri þúsund manns hafa streymt í Listasafn Reykjavíkur í Hafnarhúsi undanfarna daga til að skoða og upplifa hina kraftmiklu sýningu útskriftarnemenda í myndlistardeild og hönnunar- og arkitektúrdeild Listaháskóla Íslands.

Næstkomandi sunnudag kl. 15.00 bjóða sýningarstjórar sýningarinnar, þeir Daníel Karl Björnsson og  Jóhann Sigurðsson, gestum að ganga með sér um sýninguna og spjalla um það sem fyrir augu ber.
Í ár sýna 79 nemendur  verk sín; 47 í hönnunar-og arkitekúrdeild og 32 í myndlistardeild. Sýningin er unnin í samstarfi við Listasafn Reykjavíkur.

Hönnunar og arkitektúrdeild Listaháskóla Íslands stendur fyrir viðburðum í Hafnarhúsi Listasafns Reykjavíkur, fimmtudagskvöldið 29. apríl.

Dagskráin byrjar kl. 20.00 og er eftirfarandi:

PROJECT M - DOBLITZ REYKJAVÍK

Í miðri búsáhaldabyltingunni stóð hönnunar- og arkitektúrdeild Listaháskólans fyrir námskeiði þar sem 40 nemendur í grafískri hönnun, arkitektúr og vöruhönnun sýndu viðbrögð hönnunar við ástandinu. Markmiðið var að skoða hvernig hönnun getur orðið virkur þátttakandi í óróa samfélagsins.

Sjö hópar nemenda sem þá voru á öðru ári í sínu námi (sami hópur og er að sýna á útskriftarsýningunni núna) framleiddi 48 sekúndna vídeóverk sem sýna hvernig hönnun getur ögrað viðhorfum, mótað skoðanir og lagt til viðbrögð á opinberum vettvangi vegna hins sérkennilega þjóðfélagsástands sem hafði myndast. Verkefnunum var ætlað að sýna mátt hönnunar til að móta framtíðina á jákvæðan hátt.

Verkefninu var stýrt af John Bielenberg grafískum hönnuði frá Bandaríkjunum sem hefur stýrt sambærilegum verkefnum í heimalandi sínu og á Costa Rica.

Öllum verkefnunum verður varpað upp á skjá í Listasafni Reykjavíkur í Hafnarhúsinu fimmtudaginn 29. apríl n.k. kl.20.00

————–

LÆKJARGATA - FRÍKIRKJUVEGUR - SÓLEYJARGATA

Arkitektúr og borgarmenning er eitt birtingarform menningar sérhverrar þjóðar. Undanfarin ár hafa fyrsta árs nemar í arkitektúr við hönnunar- og arkitkektúrdeild Listaháskóla Íslands stundað rannsóknir á göturýmum í borginni. Í ár hafa nemendur rannsakað Lækjargötu ásamt Sóleyjargötu og Fríkirkjuvegi. Rannsóknin felur í sér að teikna upp hús og rými götunnar auk þess að kanna ýmsa félagslega, sögulega og umhverfislega þætti sem hafa áhrif á borgarrýmin og hvernig borgarrýmin og arkitektúr þróast samfara breyttum þörfum og væntingum samfélagsins.

Verkefnið var að hluta unnið í samstarfi við nemendur á 3ja ári sem nú sýna útskriftarverkefni sitt til BA prófs sem er tillaga að nútímalistasafni á horni Vonarstrætis og Lækjargötu.

Afrakstur skráningar- og rannsóknarvinnunnar verður kynntur í Hafnarhúsinu fimmtudaginn 29.apríl n.k. kl.20.30

—————

Eftir kynningu arkitektúrnema verður Project M endursýnt og þá með undirspili hljómsveitarinnar FACING PAGES sem spilaði einnig undir sýningunni þegar hún átti sér stað í Iðnó síðasta vetur. Facing Pages er ambient spunahljómsveit skipuð nemendum úr grafískri hönnun.

Sýning útskriftarnema er einnig opin til 22:00 - allir velkomnir.