Prófessor Erling Blöndal Bengtsson, sellóleikari hefur nú ánafnað bókasafni Listaháskóla Íslands allt sitt nótnasafn, þ.m.t. nótur og handrit sem hann hefur notað við æfingar og kennslu á sínum langa og glæsilega ferli.

Erling var staddur hér á Íslandi í byrjun desember og var gjöfin þá afhent formlega. Jafnframt kenndi Erling masterklassa við skólann þar sem efnilegum strengjanemendum gafst það einstaka tækifæri að vinna með honum.

Í tilefni af afhendingu gjafarinnar var boðið til samkomu í Listaháskólanum í Sölvhóli, tónlistarsal skólans, föstudaginn 10. desember. Þar skýrði Erling frá gjöf sinni og skólinn veitti henni formlega viðtöku. Meðlimir í Tríó Reykjavík, þau Guðný Guðmundsdóttir fiðluleikari, Gunnar Kvaran sellóleikari og Peter Maté  píanóleikari léku tónlist fyrir gesti. Að lokinni afhendingunni bauð Danska sendiráðið svo til móttöku þessum aldna meistara til heiðurs.

Rektor skólans Hjálmar H. Ragnarsson telur gjöfina afar mikils virði fyrir skólann og þá sérstaklega það að hún endurspeglar það traust og vináttu sem þessi mikli sellósnillingur ber til skólans. „Þetta er persónuleg gjöf af hendi Erlings, mikið af nótunum eru merktar með hans eigin leiðbeiningum og athugasemdum og sýnir þá hlið á listamanninum sem annars ættu fáir aðgang að” segir Hjálmar.

Laugardaginn 4. desember s.l. var opnuð ljósmyndasýning sem fjallar um fátækt og félagslega einangrun í húsakynnum Samhjálpar í Borgartúni 1 í Reykjavík. Guðbjartur Hannesson, félags- og tryggingamálaráðherra, opnaði sýninguna.

Sýningin er samstarfsverkefni Listaháskóla Íslands og Evrópuárs gegn fátækt og félagslegri einangrun en auk þeirra komu Hlutverkasetur, Hjálparstofnun kirkjunnar og Kvennasmiðjan að framkvæmd verkefnisins. Verkin á sýningunni unnu listnemar í samstarfi við fólk sem upplifir fátækt eða félagslega einangrun.

.„Verkefnið er nokkuð óvenjulegt, en tilgangurinn var að leiða saman ólíka hópa og nota listformið til að tjá raunveruleika þeirra sem kljást við fátækt eða félagslega einangrun. Verkefnið er í raun samevrópskt, en svipuðum verkefnum var hrundið af stað í öllum löndum Evrópusambandsins og í Noregi í tilefni af Evrópuári gegn fátækt og félagslegri einangrun,” segir Linda Rós Alfreðsdóttir hjá félags- og tryggingamálaráðuneytinu sem hefur umsjón með Evrópuárinu á Íslandi.

Auk sýningar á verkunum verða fimm þeirra gefin út á póstkortum sem verður dreift um land allt og er ætlað að vekja athygli á fátækt og félagslegri einangrun.

„Ég held að allir þeir sem hafa komið að verkinu hafi haft gaman að því, og það hefur sannarlega víkkað sjóndeildarhring allra. Hver nemandi starfaði með einstaklingi sem hefur reynslu af fátækt eða félagslegri einangrun og voru verkefnin því unnin í pörum. Ég hvet alla til að koma og skoða sýninguna,” segir Eric Wolf sem kenndi á námskeiðinu við Listaháskóla Íslands.

Sýningin stendur til 15. janúar og er opin á sama tíma og Kaffistofa Samhjálpar,  frá 10.00-16.00.

Hausttónleikum tónlistardeildar Listaháskólans er netvarpað með bæði mynd og hljóði í fyrsta sinn!

Hinir árlegu hausttónleikar tónlistardeildar Listaháskólans hófust mánudaginn 29. nóv. n.k. og standa til og með 15. desember.

Sú nýjung er á að í fyrsta sinn er hægt að horfa og hlusta á tónleikana beint á netinu í gegnum vef Listaháskólans þannig að þeir sem ekki eiga heimangengt geta notið tónleikanna heima í stofu eða annarsstaðar.

Tónleikarnir eru haustpróf nemenda sem stunda nám í hljóðfæraleik eða söng og er efnisskrá þeirra afar fjölbreytt. Fram koma nemendur af öllum námsárum og flytja um 15 - 20 mínútna langa efnisskrá hvert.

Allir tónleikarnir eru í Þjóðmenningarhúsinu nema orgeltónleikar sem verða haldnir í Langholtskirkju.

Aðgangur er ókeypis og allir eru hjartanlega velkomnir.

Þeir sem nota Apple tölvur þurfa að ná sér í auka hugbúnað til að geta horft á tónleikana. Honum er hægt að hlaða niður hér: VLC Player.

Smellið hér til að horfa

Hausttónleikar 2010 - efnisskrá allra tónleikanna - pdf skrá

Skrifstofur Listaháskólans verða lokaðar frá og með mánudeginum 20. desember vegna jólaleyfis. Skrifstofur skólans opna aftur eftir jólaleyfi þriðjudaginn 4. janúar kl.9.00. Kennsla vorannar hefst mánudaginn 17. janúar.

Gleðilega hátíð og farsælt komandi ár!!