Fimm útskrifaðir nemendur Listaháskólans hljóta Leónardó starfsþjálfunarstyrki á þessu skólaári.  Listaháskólinn sækir árlega um styrki til mannaskiptaverkefna til Landskrifstofu Menntaáætlunar Evrópusambandsins.  Einungis fyrirtæki eða stofnanir geta sótt í sjóðinn og töluverð samkeppni er um styrki.

Það er ánægjulegt fyrir skólann að hafa enn á ný hlotið verkefnisstyrk og geta með því móti stutt útskrifaða nemendur til að takast á við spennandi verkefni á evrópskum vinnumarkaði að loknu námi.

Leónardó verkefnið í ár nefnist Art and Design in Post-Crisis Environment og þau sem hlutu styrk eru:

Einar Ingi Sigmundsson útskrifaðist úr grafískri hönnun vorið 2009.  Hann hlaut styrk uppá 5069 evrur til að starfa með Krads Arkitektum í Árósum í Danmörku.  Krads er arkitektastofa í eigu ungra arkitekta og starfar bæði á Íslandi og í Danmörku.

Þorbjörn G. Kolbrúnarson útskrifaðist af tónsmíðabraut vorið 2010 og hlaut styrk uppá 3080 evrur til að starfa í sjö vikur hjá Lapland Studio í Finnlandi.  Lapland stúdíó sérhæfir sig á sviði þrívíðrar hönnunar og mun Þorbjörn sjá um tónlistargerð fyrir tölvuleiki og aðra miðla á starfstíma sínum.

Anna Gunndís Guðmundsdóttir útskrifaðist sem leikari vorið 2010.  Hún hlaut 5096 evrur í styrk til að starfa með SIGNA leikhópnum í Danmörku og mun taka þátt í sýningum þar og í Þýskalandi fram í maí á þessu ári.  SIGNA leikfélagið leggur áherslu á frelsi leikarans til sjálfstæðrar persónusköpunar.

Þorgerður Edda Hall útskrifaðist með BMus gráðu á selló vorið 2010.  Þorgerður Edda hlaut 5096 evrur í styrk til að starfa með Podiumfestivalen í Noregi í 16 vikur.  Podiumfestivalen er klassísk kammermúsíkhátið þar sem alþjóðlegur hópur ungra framúrskarandi tónlistarmanna kemur fram.  Hátíðin fer fram í Haugesund dagana 4.-7.mars n.k.

Ragnheiður Káradóttir útskrifaðist með BA gráðu í myndlist vorið 2010.  Hún hefur hlotið 4205 evrur í styrk til að starfa í 13 vikur hjá Slowlab stúdíónu í Amsterdam sem rekið er af vöruhönnuðinum Carolyn Strauss.  Slowlab er þekkt fyrirtæki á sviði sjálfbærrar hönnunar og “slow design”.

Listaháskólinn óskar þessum fyrrum nemendum sínum til hamingju með styrkinn og velfarnaðar í sínu fagi.

Nánari upplýsingar um Leónardó styrki má finna á síðu skólans: http://lhi.is/althjodlegt-samstarf/leonardo-mannaskipti/

Tveggja vikna námskeiði sem ber yfirskriftina Samtal og hefur staðið yfir nú í janúar í Listaháskólanum lauk með opinni dagskrá föstudaginn 28. janúar. Í námskeiðinu hafa tekið þátt um hundrað nemendur undir leiðsögn tólf leiðbeinenda úr öllum grunndeildum skólans og unnið með samsetningu hverskonar verka, atriða, gjörninga, fyrirlestra eða uppákoma.

Föstudaginn 28. janúar n.k. var afrakstur námskeiðsins kynntur í Útgerðinni, Hugmyndahúsi háskólanna, með opinni dagskrá og hófst hún kl. 9.00 með óperuflutningi. Síðan var samfleytt dagskrá til kl. 13.00. Um kvöldið kl. 20.00 var svo lokaathöfn í Toppstöðin, yfirgefinni rafstöð, en yfir henni hvíldi mikil leynd.

Sjá nánar um námskeiðið: http://icelanddialogue.wordpress.com/

Samtal er sameiginlegt námskeið allra grunndeilda Listaháskóla Íslands, þar sem nemendur starfa í hópum innan sama ramma. Á tímabilinu vinna hóparnir að samsetningu hverskonar verka, atriða, gjörninga, fyrirlestra eða uppákoma, þar sem samþætting ólíkra hugmynda og aðferða er höfð að leiðarljósi. Á tímabilinu fara fram ýmsar umræður og fyrirlestrar er tengjast námsefninu, þar sem leiðbeinendur hvers hóps leggja línurnar hvað varðar úrvinnslu og framsetningu verkefna. Námskeiðið stendur í tvær vikur og hefst hver morgun með fyrirlestri í Útgerðinni í Hugmyndahúsi háskólanna og að þeim loknum taka hóparnir til starfa við sína vinnu.

VIÐBYGGINGIN - HÁDEGISFYRIRLESTUR mán. 31. jan kl 12:30, Listaháskóla Íslands, Laugarnesvegi 91 Reykjavík

Dr. Geir Sigurðsson heimspekingur heldur hádegisfyrirlestur í fyrirlestrarröðinni VIÐBYGGINGIN á vegum myndlistardeildar Listaháskóla Íslands, Laugarnesvegi 91, stofu 024,mánudaginn 31. jan. 2011, kl. 12:30. Fyrirlestur hans nefnist:  Þegar fjöllin verða aftur fjöll: Um veruleikasýn í daoisma og zen.

Áhrif daoisma á kínverska og austur-asíska menningu verður vart ofmetin. Síðan Laozi var og hét fyrir rúmum 2500 árum hefur daoismi breiðst víða út um álfuna, blásið búddisma í brjóst kínversk-japanska útfærslu sína í formi chan (zen) og alla tíð ljáð a-asískum listamönnum, skáldum og drykkfelldum bóhemum vængi ímyndunaraflsins til að hefja sig yfir venjubundin viðhorf. Daoisminn einblínir á hið hversdagslega - það er veruleiki hans - en hann storkar jafnframt hefðbundnum gildum okkar, sjónahornum og rökvísi til að upphefja hversdagsleikann yfir sjálfan sig. Hið hversdagslega verður þá um leið hið stórbrotna, hið tilþrifalitla hið magnþrungna og  hið daufa fyrst og fremst ómissandi bakgrunnur áhrifamikilla útlína sískapandi verðandi. Í erindinu verður leitast við að varpa ljósi á gagnkvæmar umbreytingar manneskju og veruleika samkvæmt daoisma og zen með tilvísun í fornrit á borð við Ferliđ og dygđina (Daodejing), Zhuangzi og Huang Bo.

Geir Sigurðsson (f. 1969) er doktor í heimspeki frá Hawaii-háskóla þar sem hann einblíndi einkum á kínverska heimspeki. Hann er dósent í kínverskum fræðum og forstöðumaður Konfúsíusarstofnunarinnar Norðurljóss við Háskóla Íslands.

VIÐBYGGINGIN er  fyrirlestraröð á vegum myndlistardeildar Listaháskóla Íslands í Laugarnesi. Hún  kemur í beinu framhaldi af hinum velsóttu Bakherbergjum sem opnuð voru í Listaháskólanum á haustmisseri en þar leiddu myndlistarmenn viðstadda að uppsprettum verka sinna. Rætur listaverka liggja víða og stundum djúpt. Þær geta verið augljósar en oftar en ekki vaxa þær hljóðlega inn í heima hugvísinda eða þræða sig með þruski inn undir gólf rannsóknarstofunnar í viðbyggingunni.
Í fyrirlestraröðinni munu einstaklingar úr ólíkum áttum fræðasamfélagsins leggja við hlustir, finna sameiginlega fleti og mynda óvænta skurðpunkta milli fræða og lista

Allir velkomnir
MYNDLISTARDEILD LHÍ

Verkefnið Scintilla - ilmandi textíll fékk nú á dögunum frumherjastyrk frá Tækniþróunarsjóði Rannís, en verkefnið er á vegum Lindu Bjargar Árnadóttur fagstjóra í fatahönnun.

Alls bárust 102 umsóknir í Tækniþróunarsjóð í haust en stjórn sjóðsins ákvað á fundi sínum í lok desember 2010 að bjóða tuttugu og þremur verkefnisstjórum að ganga til samninga um verkefni, þar af eru sex frumherjastyrkir.

Scintilla er íslenskt fyrirtæki, í eigu Lindu Bjargar, sem hannar og lætur framleiða heimilistextíl og vörur. Í heimilislínu Scintilla eru m.a. rúmföt, borðdúkar, handklæði, teppi, rúmteppi, náttföt og baðsloppa.

Verkefnið Scintilla - ilmandi textíl er þróun nýrrar vörutegundar þar sem þróaður er textíll sem ilmar af íslenskri náttúru. Scintilla mun nota nýja tækni sem gerir framleiðendum kleyft að setja ilm varanlega í textíl, þ.e. lyktin fer ekki úr efninu þó það sé þvegið. Er hugmyndin að nota ilmi úr náttúru Vestfjarða.

Scintilla vinnur nú þegar með framleiðslufyrirtækjum í Portúgal sem getur framleitt textíl með ilmi og hefur hafið samstarf við Brent Richard, sérfræðing í lyktarhönnun.

Einnig verða hugmyndirnar þróaðar áfram í samvinnu við hönnunar-og arkitektúrdeild Listaháskólans. Stefnt er að því að varan komi á markað eftir tvö ár.

Scintilla mun sýna vörur sínar á „Smash and Grab” sýningunni í Spark Design Space sem opnar á hönnunarmarsi 25 mars n.k.

Sjá nánar:  www.Scintillalimited.com

Frumherjastyrkir eru sniðnir að þörfum sprotafyrirtækja og frumkvöðla með verkefni á byrjunarstigi. Frumherjinn er sjálfur í fyrirrúmi og hyggst eða hefur stofnað fyrirtæki um hugmynd sína. Nýnæmi er mikið og rannsóknaþáttur verkefnisins er verulegur. Verkefnin eru einungis styrkt til tveggja ára. Gert er ráð fyrir að umsækjendur sæki um verkefnisstyrk í framhaldi af frumherjastyrk ef niðurstaða gefur tilefni til.