Listaháskóli Íslands auglýsir eftir umsóknum um starf forstöðumanns bókasafns og upplýsingaþjónustu skólans vegna afleysinga fyrir núverandi forstöðumann. Um er að ræða tímabundna ráðningu til eins árs frá og með 1. október næstkomandi.

Forstöðumaður bókasafns stýrir starfsemi bókasafns og upplýsingaþjónustu skólans. Hann fer með daglega umsýslu safnsins, stýrir skipulagningu safnefnis og aðgengi, leggur fram áætlanir um uppbyggingu safnkosts, búnaðar og þjónustu, gerir fjárhagsáætlanir, og mótar heildarstefnu með tilliti til þarfa mismunandi notendahópa og deilda skólans. Forstöðumaður er einnig ritstjóri vefs Listaháskóla Íslands og starfar í nánum tengslum við aðra forstöðumenn, stjórnendur og kennara skólans.

Bókasafn Listaháskóla Íslands er sérfræðisafn á sviði þeirra listgreina sem kenndar eru við Listaháskóla Íslands og er safnið stærsta listbókasafn landsins. Helstu efnisflokkar eru myndlist, hönnun, arkitektúr, leiklist, dans, tónlist, listkennsla, lista- og menningarsaga., listheimspeki og listfræði. Meginhlutverk þess er að veita stuðning við nám, kennslu og rannsóknir við skólann. Frekari upplýsingar um safnið er að finna á heimasíðu skólans - bokasafn.lhi.is

Umsækjendur skulu hafa lokið meistaranámi í bókasafns- og upplýsingafræði eða hafa annað meistaranám sem leggja má til jafns við slíkt nám. Sérstaklega verður litið til þess hvort umsækjandi geti starfað sjálfstætt, deilt verkefnum til samstarfsmanna sinna og virkjað frumkvæði þeirra. Ennfremur skiptir máli að umsækjandi hafi lifandi áhuga á listum og framgangi þeirra. Starfið er krefjandi og verður sá sem því gegnir að vera útsjónarsamur, forkur til verka, og hafa glöggt auga fyrir  nýjum tækifærum, hvort sem er í rekstri eða á hinu faglega sviði.

Umsóknum og meðfylgjandi gögnum skal skila á skrifstofu skólans, Skipholti 1, 105 Reykjavík, eigi síðar en föstudaginn 10. júní næstkomandi. Farið verður með umsóknir sem trúnaðarmál. Skólinn áskilur sér rétt til að hafna þeim öllum. Fyrirspurnir um starfið, merktar “forstöðumaður bókasafns,” skulu sendar á netfang lhi@lhi.is

Listaháskóli Íslands er sjálfseignarstofnun með það hlutverk að sinna æðri menntun á sviði listgreina. Skólinn starfar í fimm deildum: hönnunar- og arkitektúrdeild, myndlistardeild, leiklistar- og dansdeild, listkennsludeild og tónlistardeild. Rektor skólans er Hjálmar H. Ragnarsson, tónskáld.

Samsýning myndlistarnema frá listaháskólum hvaðanæva í Evrópu, Golden Kentaur European Art Award, var opnuð í Munchen í Þýskalandi nú á dögunum, með þátttöku fjögurra nemenda myndlistardeildar Listaháskóla Íslands.

Að þessu sinni var óskað eftir verkum sem unnin væru í miðil ljósmyndunar og út frá þema sýningarinnar sem er „Blekking og veruleiki.” Þátttakendur frá myndlistardeild Listaháskólans voru Þórunn Rán Jónsdóttir, Erik Thomas Richard Hirt og Claudia Hausfeld, sem öll eru að ljúka 2. ári og útskriftarneminn Klængur Gunnarsson.

Aðstandendur sýningarinnar, Munchner Kunstlerhaus, buðu öllum þátttakendum, nemendum frá þrjátíu listaháskólum í Evrópu, að koma til Munchen og vera viðstödd opnun sýningarinnar og útgáfu veglegrar sýningarskrár með öllum verkum þátttakenda og upplýsingum um viðkomandi skóla. Af því tilefni heiðraði dómnefnd einnig sérstaklega verk nokkurra þátttakenda. Meginmarkmið verkefnisins er að styrkja samskipti nemenda evrópskra listaháskóla.

Ásthildur Björg Jónsdóttir hefur verið ráðin í stöðu lektors í kennslufræði sjónlista við listkennsludeild Listaháskólans.

Ásthildur  lauk bakkalárprófi í menntunarfræðum með myndmennt sem kjörsvið frá Kennaraháskóla Íslands árið 1996, og meistaraprófi með áherslu á tölvu-  og upplýsingatækni í myndmenntakennslu frá sama skóla 2003. Að loknu námi hér á Íslandi hóf hún nám við New York University í New York þaðan sem hún lauk meistaragráðu í listkennslu með áherslu á fjölmenningu 2007.

Starfsreynsla Ásthildar er fjölþætt. Hún hefur starfað sem myndmenntakennari við grunn- og framhaldsskóla, unnið með fullorðnum nemendum í félagsmiðstöð í New York, kennt starfræna myndvinnslu og unnið að námskrárgerð á framhaldsskólastigi, auk þess að reka skóla fyrir íslensk börn erlendis. Þá hefur hún unnið fjölmörg verkefni á sviði námsefnis- og námsskrárgerðar, og hefur til að bera mikla reynslu í notkun tölvu- og upplýsingatækni á sviði listkennslu.

Ásthildur hefur starfað sem aðjúnkt við listkennsludeild Listaháskólans frá hausti 2009, auk þess sem hún hefur kennt nokkur námskeið á menntavísindasviði Háskóla Íslands. Sérsvið hennar í háskólakennslu hefur verið kennslufræði sjónlista og gildi myndmenntakennslu, m.a. með áherslu á fjölmenningu og sjálfbærni. Ásthildur vinnur nú að rannsókn um listkennslu og menntun til sjálfbærrar þróunar, sem er hluti af doktorsnámi hennar við Háskóla Íslands.

Nú á dögunum fékk Listaháskólinn úthlutað styrk frá Leónardó Menntaáætlun ESB í flokknum mannaskipti - ungt fólk á vinnumarkaði uppá liðlega þrjár milljónir íslenskra króna.  Verkefnið nefnist “Moving Skills in Art and Design” og miðar að því að styrkja fjóra - sex einstaklinga til starfsþjálfunar í Evrópu.  Aldrei hafa eins margar stofnanir og fyrirtæki óskað eftir styrkjum og því er það skólanum sönn ánægja að hafa enn á ný hlotið útlutun úr sjóðnum.  Nú þegar hefur skólinn styrkt nítján útskrifaða nemendur til starsþjálfunar í eftirtöldum greinum: arkitektúr, hönnun, myndlist, tónlist, sviðslistum og listkennslu.  Þessir einstaklingar hafa tekist á við spennandi og krefjandi verkefni víðs vegar um Evrópu sem vafalaust mun skila sér (með beinum eða óbeinum hætti) inní greinarnar hér á landi.

Nemendur sem útskrifast í vor eða lokið hafa prófgráðu frá Listaháskólanum á s.l. tveimur árum geta nú sótt um styrk til starfsþjálfunar í Evrópu á tímabilinu 1.júní 2011 til 30.maí 2012.  Veittir verða styrkir til starfsþjálfunar að lágmarki í fjórar vikur og að hámarki í tólf vikur.  Skilyrði fyrir styrk er að starfsþjálfunin hafi efnislega tengingu við það nám sem ástundað var í Listaháskólanum.  Næsti umsóknarfrestur fyrir starfsþjálfunarstyrki er 6. júní n.k.

Nánari upplýsingar um verkefnið og umsóknarferli er að finna á vefsíðu Listháskólans: http://lhi.is/althjodlegt-samstarf/leonardo-mannaskipti/

Mynd með frétt: sýnir leikhópinn SIGNA að störfum en nemandi sem útskrifaðist af leikarabraut vorið 2010 hlaut styrk til að starfa með leikhópnum á fjögurra mánaða tímabili núna í vetur.  Nánar um SIGNA: http://signa.dk