Föstudaginn 28. október kl. 13-16 verður þýska söngkonan Eva Märtson með masterklass fyrir nemendur söngdeildar Listaháskólans í Sölvhóli, Sölvhólsgötu 13. Viðfangsefni kennslunnar, sem fer fram á ensku er „þýska sönglagið” og munu nemendur syngja lög eftir Schubert, Brahms, Hugo Wolf og fleiri við meðleik Selmu Guðmundsdóttur.

Eva Märtson á að baki umfangsmikinn söngferil með tónleikum víða um heim, m.a. í Carnegie Hall í New York. Hún hefur kennt söng, raddbeitingu og túlkun við Hochschule für Musik und Theater í Hannover frá 1989. Hún hefur verið gestakennari víða í Evrópu, Ameríku og Ástralíu. Hún er forseti Alþjóðasamtaka Wagnerfélaga og er hér á landi í boði Richard Wagner félagsins á Íslandi og þýska sendiráðsins.

Hún mun halda fyrirlestur, opinn almenningi, á vegum Wagnerfélagsins á laugardaginn kl. 18 á Hótel Holti undir heitinu The Bayreuth Idea, og mun hann fjalla um Wagnerhátíðina í Bayreuth fyrr og nú.

Nemendaleikhús Listaháskóla Íslands hefur hafið æfingar á verkinu Jarðskjálftar í London eftir Mike Bartlett í þýðingu Heiðars Sumarliðasonar.  Verkið er glænýtt en það var frumsýnt árið 2010 í National Theatre í London við góðar undirtektir og var Bartlett í kjölfarið hampað sem ferskri rödd í bresku leikhúslífi.

★★★★ -Daily Express, Daily Telegraph, Evening Standard, Guardian, Independent

“Leikrit fullt af uppákomum og nýungum… staðfestir að höfundur verksins Mike Bartlett er einn af okkar mest spennandi leikritaskáldum” -Evening Standard

Í þessari mögnuðu rússíbanaferð þeytumst við um í tíma og rúmi frá 1968 til 2525 og aftur til baka.  Hressileg umfjöllun um það sem framtíðin ber í skauti sér og þær miklu hamfarir sem ganga yfir samfélög okkar í dag.  Burlesque fatafellur, martraðir, efnahagshrun, mannfjöldasprengingar og allsherjar paranoia.  Saga af snörpum hræringum í lífi þriggja systra sem reyna af öllum mætti að bjarga sér og sínum úr hamförum og framförum nútímans á meðan faðir þeirra, heimsfrægur vísindamaður, boðar heimsendi.

Ögrandi uppákomur, húmor og hráar tilfinningar.

Jarðskjálftar í London er annað verkefni Nemendaleikhússins í ár, en nýlokið er sýningum á fyrstu uppfærslu vetrarins; Á botninum eftir Maxim Gorkí, sem fékk mjög góðar viðtökur.

Leikstjóri er Halldór E. Laxness, leikmynd og búningar eru hönnun Tinnu Ottesen, hljóðmynd er í höndum Georgs Kára Hilmarssonar, lýsingu annast Jóhann Friðrik Ágústsson, danshöfundur er Brogan Davison og myndbönd eru hönnuð af Brynju Björnsdóttur.

Frumsýning er föstudaginn 2. desember 2011.

Nemendaleikhúsið í vetur skipa: Hjörtur Jóhann Jónsson, Kolbeinn Arnbjörnsson, Olga Sonja Thorarensen, Ólöf Haraldsdóttir, Pétur Ármansson, Saga Garðarsdóttir, Sara Margrét Nordahl, Sigurður Þór Óskarsson, Snorri Engilbertsson og Tinna Sverrisdóttir.

Æfingar hjá Nemendaleikhúsinu eru frá kl. 10 - 16 alla virka daga.

Gunnsteinn Ólafsson heldur hádegisfyrirlestur við tónlistardeild LHÍ í Sölvhóli föstudaginn 28. október kl. 12-12:45.

Listin að vera Liszt

Um þessar mundir eru 200 ár liðin frá fæðingu Franz Liszts.  Að því tilefni er efnt til afmælishófs í Sölvhól föstudaginn 28. október nk. kl. 12.00.  Þar segir Gunnsteinn Ólafsson frá ævi tónskáldsins og fjallar um nokkur helstu verk hans.  Franz Liszt var einn áhrifamesti tónlistarmaður 19. aldar.  Hann ólst upp í Ungverjalandi en varð strax á unglingsárum alþjóðleg stjarna sem píanósnillingur og tónskáld.  Hann tók Wagner upp á sína arma sem og fjölmörg önnur tónskáld og kom þeim á framfæri.  Sjálfur var hann miklu frumlegri en Wagner í tónsmíðum sínum og samdi fyrsta „tólftónaverkið” hálfri öld á undan Arnold Schönberg.  Í fyrirlestrinum verður - á gamansömum nótum - sagt frá kvennafari tónskáldsins og hversu mikil áhrif veikara kynið hafði á líf hans og starf, jafnvel eftir að Liszt var genginn í klaustur.

Gunnsteinn Ólafsson stundaði nám við Franz Liszt-tónlistarakademíuna í Búdapest á árunum 1983-1987 og síðan í Tónlistarháskólanum í Freiburg í Þýskalandi til 1992.  Hann kennir við tónlistardeild LHÍ og Tónlistarskólann í Reykjavík auk þess að stjórna Háskólakórnum og Sinfóníuhljómsveit unga fólksins.

Fyrirlesturinn fer fram í Sölvhóli, Sölvhólsgötu 13 og er aðgangur ókeypis og allir velkomnir.

Nemendur tónlistar- og myndlistardeildar Listaháskóla Íslands tóku virkan þátt á Airwaves tónlistarhátíðinni um nýliðna helgi.

Um fjórðungur nemenda tónlistardeildar kom fram á fjölda tónleika víðsvegar um bæinn. Meðal annars léku þeir með hljómsveitunum Úlfur, Orphic Oxtra, Musik Zoo, Porquesí, Gang Related, Snjólugt, Sing for me Sandra, Lockerbie og Markús and the Diversion Sessions. Tónleikarnir voru hvoru tveggja on og off-venue, en off-venue vettvangurinn var sérstaklega stór og fjölbreyttur í ár og dreifður á fjölmarga staði. Úr myndlistardeild skipulagði hópur nemenda þriggja daga off-venue dagskrá á Kaffistofunni á Hverfisgötu þar sem fram komu um 20 hljómsveitir. Þar af voru hljómsveitirnar Tamarin/(), Elwis, Pro-jektors, Ekki neitt, Bárujárn, Mammút, Two Tickets To Japan, Byssukisi, Jarðafjör, Muck, Sparkle Poison og Baku Baku skipaðar nemendum deildarinnar.

Þátttaka þeirra er dæmi um þann lifandi og virka þátt sem nemendur Listaháskólans eiga í listalífi Reykjavíkur.