Hádegisfyrirlestur í myndlistardeild mánudaginn 6. febrúar kl.12.30. Listaháskóla Íslands, Laugarnesvegi 91, Reykjavík í fyrirlestrarröðinni VINNUSTOFAN.

Jón Proppé fjallar um sýningarstjórnun og skrif um myndlist og reynir að miðla fræðandi og skemmtilegum molum af löngum ferli sínum við allskonar stúss kringum myndlist og kenningar.

Jón Proppé (fæddur 1962) er heimspekingur en hefur aðallega fjallað um myndlist síðustu tvo til þrjá áratugi. Eftir hann liggur á fimmta hundrað greina, bókarkafla, sýningarskráa og bóka, og hann er einn af höfundum Íslenskrar listasögu sem út kom í fyrra. Hann hefur líka stýrt og sett upp tugi sýninga á Íslandi og hingað og þangað í útlöndum. Í fyrirlestrinum mun hann fjalla á opinskáan hátt um reynslu sína af sýningarstjórnun og leitast við að draga af henni lærdóm, vara við hættum og gefa góð ráð.

Myndin sýnir Jón við hlið styttu Aðalheiðar S. Eysteinsdóttur af Magnúsi Pálssyni, myndlistarmanni og -kennara.

Vinnustofan er íverustaður stöðugrar gerjunar, ígrundunar, tilviljanna, mistaka og úrvinnslu. Á vormisseri munu ólíkir myndlistarmenn leiða viðstadda í gegnum samtal hugar og handa, vinnuferli og aðferðir, í fullvissu jafnt sem efa. Allir eiga þeir sér sína vinnustofu, hvort sem hún er aðgreint rými sem slík ellegar horn á stofuborði, vinnustofa flakkarans sem gerir alla staði og engan að sínum eða skissubók í hendi.

Fyrirlestrarnir eru öllum opnir og hefjast klukkan 12:30 í húsnæði deildarinnar að Laugarnesvegi 91 í Reykjavík.

Rektor Listaháskólans hefur ráðið Sigrúnu Sigurðardóttur, menningarfræðing, í starf fagstjóra í fræðigreinum hönnunar og arkitektúrs. Ráðningin felur í sér starfsheiti lektors. Þriggja manna sérskipuð dómnefnd mat Sigrúnu “vel hæfa” til starfsins, og byggir nefndin mat sitt á því að menntun hennar og reynsla falli að öllu leyti vel að starfinu eins og það er skilgreint af hendi skólans.

Sigrún lauk bakkalárprófi í sagnfræði frá Háskóla Íslands 1998 og cand.mag prófi í menningarfræði og menningarmiðlun frá Háskólanum í Kaupmannahöfn 2004. Lokaritgerð hennar þar, Det traumatiske øjeblik [Trámatískt augnablik], fjallaði um hvernig nota mætti ljósmyndir í samhengi listar til að afbyggja  og brjóta upp staðlaðar myndir af veruleika fortíðarinnar. Lokaritgerðin kom út sem bók í hinni virtu ritröð Rævens Sorte Bibliotek hjá Politisk Revy í Kaupmannahöfn. Sigrún stundar nú doktorsnám við Háskóla Íslands samhliða starfi sínu við Listaháskólann

Síðan Sigrún kom heim frá námi hefur hún verið afar afkastamikil á sviði rannsókna og útgáfu. Rannsóknir hennar hafa einkum beinst að ljósmyndum, sem hún setur í listfræðilegt og menningarlegt samhengi. Ennfremur hefur hún lagt áherslu á miðlun trámatískrar upplifunar og hvernig slík upplifun varðveitist í minningum fólks.

Nú þegar liggja eftir Sigrúnu þrjár bækur á sviði ljósmyndafræða, auk þess sem hún hefur skrifað fjölda texta í sýningaskrár og listaverkabækur. Meðal útgefinna verka hennar eru bækurnar Afturgöngur og afskipti af sannleikanum (2009), Endurkast. Íslensk samtímaljósmyndun (2008), Det traumatiske øjeblik (2006) og Elskulega móðir mín, systir, bróðir, faðir og sonur (1999).

Þá hefur Sigrún sett upp viðamiklar sýningar sem tengjast viðfangsefnum hennar á sviði rannsókna. Má þar nefna sýninguna Heima/Heiman sem hún vann í samstarfi við Katrínu Elvarsdóttur fyrir Ljósmyndasafn Reykjavíkur 2008, sýninguna Þrælkun, þroski og þrá fyrir Þjóðminjasafn Íslands 2009, og sýninguna Leiftur á stund hættunnar sem hún setti upp í Listasafni Árnesinga árið 2009.

Sigrún hefur að baki fjölbreytta reynslu sem kennari. Hún hefur kennt sem aðjúnkt við Listaháskólann allt frá árinu 2006 og hefur samtímis haft á hendi fagstjórn í fræðigreinum hönnunar- og arkitektúrdeildar. Helstu námskeiðin eru rannsóknaraðferðir, menningarfræði og ljósmyndafræði. Þá hefur hún jafnframt kennt sérhæfð námskeið á sviði menningarfræða og rannsóknaraðferða við Háskóla Íslands.

Ráðning Sigrúnar tók gildi þann 1. janúar síðastliðinn.

Hádegisfyrirlestur í myndlistardeild mánudaginn 30. janúar kl.12.30. Listaháskóla Íslands, Laugarnesvegi 91, Reykjavík.

Breska myndlistarkonan Olivia Plender fjallar um verk sín og vinnuaðferðir í fyrirlestraröðinni Vinnustofan við myndlistardeild Listaháskóla Íslands. Fyrirlestrarnir eru öllum opnir og hefjast klukkan 12:30 í húsnæði deildarinnar að Laugarnesvegi 91 í Reykjavík. Fyrirlesturinn fer fram á ensku.

Olivia Plender (fædd 1977) býr og starfar í Berlín. Hún mun fjalla um myndlist sína og vinnuaðferðir sem eru rannsóknarmiðaðar. Í umfangsmiklum verkefnum hefur hún tekist á við hugmyndafræðileg viðfangsefni sem tengjast sögulegum málefnum, upp á síðkastið málefni sem fjalla um breytingar er varða menntun og samfélagsleg gildi.

Olivia Plender hefur sýnt alþjóðlega, m.a. á sýningunum the British Art Show 10, Hayward Gallery, London (2011); Taipei Biennial, Taipei, Taiwan (2010); Aadieu, Adieu Apa (Goodbye Goodbye Father), Gasworks Gallery (2009); Altermodern: Tate Triennial 2009, Tate Britain; Bucharest Biennial, Bucharest, Romania; The Greenroom, Hessel Museum of Art, CCS Bard, New York, (2008); The Great Transformation, Frankfurter Kunstverein, Frankfurt (2008); Information, Education, Entertainment, Marabou Parken Annex, Stockholm (2007); Tate Triennial, Tate Britain, London (2006); Busan Biennial, Busan, South Korea (2006); BMW: 1X Baltic Triennial of International Art, CAC, Vilnius (2005); Romantic Detachment, PS1/ MoMA, New York (2004).

Vinnustofan er íverustaður stöðugrar gerjunar, ígrundunar, tilviljanna, mistaka og úrvinnslu. Á vormisseri munu ólíkir myndlistarmenn leiða viðstadda í gegnum samtal hugar og handa, vinnuferli og aðferðir, í fullvissu jafnt sem efa. Allir eiga þeir sér sína vinnustofu, hvort sem hún er aðgreint rými sem slík ellegar horn á stofuborði, vinnustofa flakkarans sem gerir alla staði og engan að sínum eða skissubók í hendi.

Fyrirlesturinn er á ensku og eru allir velkomnir!

Á morgun, föstudag verða lokakynningar samræðunámskeiðsins Samtals sem staðið hefur yfir síðustu tvær vikur.  Alls hafa 128 nemendur úr öllum deildum (nema listkennsludeild) tekið þátt í námskeiðinu og hafa þeir starfað í 10 hópum með jafnmörgum leiðbeinendum. Halldór Gíslason prófessor í hönnun við KHiO listaháskólann í Osló hefur stýrt námskeiðinu.

Óhætt er að lofa skemmtilegum kynningum og eru allir velkomnir!

Dagskráin hefst í Laugarnesi, húsnæði myndlistardeildar kl. 9.00

Dagskráin er eins og hér segir:

Kl. 9:00 - Hópur Hönnu Styrmisdóttir á efri hæð hússins en mæting er á jarðhæð, konur sér og karlar sér fylgi leiðbeinendum.

Kl. 9:15 - Hópur Ingibjargar Sigurjónsdóttur utanhúss og hugsanlega í fyrirlestrasal.

Kl. 9:30 - Hópur Körnu í fyrirlestrasal.

Kl. 9:45 - Hópur Fionu Gribben í fyrirlestrasal.

Kl. 10:00 - Kaffihlé.

Kl. 10:30 - Steinunn Ketilsdóttir - dans á ganginum eða í salnum.

Kl. 10:45 - Hópur Ólafs Axelssonar í fyrirlestrasal.

Kl. 11:15 - Hópur Högna Egilssonar - herb við kaffirými kallað Fingurbjörg.

Kl. 11:45 - Hópur Kristínar Gunnarsdóttur í fyrirlestrasal.

Á meðan þetta fer fram verður móttaka í ljósmyndun frá ganginum í upptökustúdíói.

Síðar um daginn:

Kl. 19:00 Hópur Anthons Kaldal Sigurjónssonar verður í Útgerð, Grandagarði 16 og fer síðan í Leiklistar- og dansdeild, Sölvhólsgötu 13.

Að því loknu tekur hópur Kristrúnar Thors við á Sölvhólsgötu 13.