Andri Björn Róbertson, bassabarítón og Helga Kristbjörg Guðmundsdóttir, harmóníkuleikari

hlutu styrk úr styrktarsjóði Halldórs Hansen

en afhendingin fór fram í gær, miðvikudaginn 1. september.

Tveir ungir tónlistarmenn þau Andri Björn Róbertsson, bassabarítón og Helga Kristbjörg Guðmundsdóttir, harmóníkuleikari hlutu í gær, miðvikudaginn 1. september, styrk úr styrktarsjóði Halldórs Hansens að upphæð 400.000. hver.

Styrktarsjóður Halldórs Hansen starfar undir væng Listaháskólans og veitir árlega styrki til tónlistarnema sem hafa að mati sjóðsstjórnar náð framúrskarandi árangri á sínu sviði. Styrktarsjóður Halldórs Hansen var formlega stofnaður 2004 og er þetta í sjöunda sinn sem veitt eru verðlaun út sjóðnum.

Gert er ráð fyrir að styrkþegar hafi lokið háskólanámi á grunnstigi en Andri Björn lauk burtfaraprófi frá Söngskólanum í Reykjavík í vor og Helga Kristbjörg lauk BA-gráðu í harmóníkuleik frá Listaháskóla Íslands síðasta vor en hún er fyrsti nemandi til að ljúka gráðu af því tagi frá tónlistardeild Listaháskólans.

Boðið var til hátíðardagskrár af þessu tilefni þar sem tilkynnt var um verðlaunahafa sjóðsins 2010 og komu þau fram á samkomunni. Það var mikil stemning að hlusta á flutning þessara ungu tónlistarmanna en þau eiga væntanlega eftir að láta að sér kveða í framtíðinni en bæði stefna þau á tónlistarnám erlendis í haust.

Um styrkþegana:

Andri Björn Róbertsson bassabarítón fæddist árið 1989 í Reykjavík og hóf tónlistarnám ungur að árum og hefur sungið í kór frá fimm ára aldri. Níu ára gamall byrjaði hann í kórastarfinu í Langholtskirkju og hefur sungið með kórunum þar hingað til; nú síðast með Kór og Kammerkór Langholtskirkju undir stjórn Jóns Stefánssonar. Andri hóf söngnám sitt tíu ára gamall, hjá Ólöfu Kolbrúnu Harðardóttur sem hefur verið kennari hans síðan. Hann lauk Grunnprófi árið 2005 frá Söngdeild Kórskóla Langholtskirkju, hóf þá nám við Söngskólann í Reykjavík og lauk þaðan burtfararprófi s.ll vor. Þar hefur Andri einnig notið leiðsagnar Kristins Arnar Kristinssonar og Iwonu Aspsar Jagla.

Andri hefur sótt ýmis námskeið hjá mörgum afar virtum kennurum og söngvurum, m.a. Galinu Pisarenko, Elisabeth Meyer-Topsoe, Alexander Schmalcz, Þóru Einarsdóttur, Kristni Sigmundssyni, Dennis O’Neill, José Carreras, Dalton Baldwin og Dame Kiri Te Kanawa. Hann sótti Solti Te Kanawa Accademia di bel canto á Ítalíu í boði Dame Kiri, þar sem einungis tólf efnilegir söngvarar hvaðanæva úr heiminum komust að.  Andri hefur tekið þátt í ýmsum uppfærslum Nemendaóperu Söngskólans í Reykjavík m.a. Töfraflautunni, sungið Fígaró í Brúðkaupi Fígarós, og nú síðast titilhlutverkið í óperusamsuðunni Don Djammstaff. Samhliða námi sínu í Söngskólanum í Reykjavík stundaði Andri  nám við Kvennaskólann í Reykjavík og lauk stúdentsprófi þaðan vorið 2009. Hann hefur oft komið fram sem einsöngvari við ýmis tækifæri m.a. á Jólasöngvum Kórs Langholtskirkju og í Jóhannesarpassíunni.  Andri mun hefja nám við Royal Academy of Music í London nú í haust.

Helga Kristbjörg Guðmundsdóttir er fædd og uppalin á Ísafirði. Hún stundaði nám við Tónlistarskóla Ísafjarðar nær óslitið frá 1995-2007 þar sem aðalnámsgrein hennar var harmonika. Fyrstu árin naut hún leiðsagnar Messíönu Marzellíusdóttur en árið 1999 tók Vadim Fjodorov við harmonikukennslunni og vorið 2003 lauk hún 6. stigi á hnappaharmoniku. Veturinn 2006-2007 var Hrólfur Vagnsson kennari hennar við skólann. Hún stundaði einnig píanónám um nokkurra ára skeið og lauk miðprófi. Haustið 2004 stundaði Helga tónlistarnám í Frakklandi við tónlistarskólann Centre National & International de Musique & d’Accordéon (la CNIMA) þar sem aðalkennarar hennar voru J. Mornet, Roman Jbanov og Domi Emorine. Helga Kristbjörg hefur komið fram á fjölda tónleika og við ótal önnur tækifæri og hefur einnig starfað sem harmonikukennari við Tónlistarskóla Ísafjarðar og Tónlistarskóla Hafnarfjarðar. Haustið 2007 hóf Helga Kristbjörg nám við Listaháskóla Íslands undir handleiðslu Tatu Kantomaa og síðar Vadims Fjodorov og lauk þaðan BA-gráðu s.l. vor.

Í tilefni þátttöku þýska leikhópsins Rimini Protokoll á leiklistarhátíðinni LÓKAL stendur leiklistar- og dansdeild Listaháskólans fyrir málstofu með Helgard Haug, listrænum stjórnanda hópsins, föstudaginn 3. september kl. 11.00

Rimini Protokoll hefur á undanförnum árum vakið mikla eftirtekt fyrir sviðsetningar sínar sem staðsettar eru á mörkum leiks og raunveruleika, þar sem ólík svið mannslífins eru tekin fyrir, s.s. stjórnmál, dauðinn, fréttamennska og rusl svo fátt eitt sé nefnt. Hópurinn kallar til liðs við sig „sérfræðinga“ á hverju sviði, sem sjálfir miðla sögum sínum á sviðinu í samvinnu við listræna stjórnendur hópsins.
Helgard Haug mun í málstofunni ræða um vinnuaðferðir hópsins, sérstaklega út frá sýningunni “Black Tie”, sem sýnd verður innan dagsrá LÓKAL í Borgarleikhúsinu 2. og 3. september.

Málstofan verður haldin í Sölvhóli, Sölvhólsgötu 13, fer fram á ensku og er öllum opin.
Nánari upplýsingar um Rimini Protokoll má finna á www.rimini-protokoll.de og um LÓKAL á www.lokal.is

Í september mun Hugmyndahús háskólanna hleypa af stokkunum Hugmyndasmiðjunni 2010 fyrir frumkvöðla sem ganga með hugmynd í maganum eða eru komnir skammt á veg og vilja koma henni í framkvæmd. Hér verður spyrnt saman skapandi greinum, tækni, vísindum og viðskiptum því allir eru velkomnir. Í Hugmyndasmiðjunni vinna þátttakendur að því að ramma inn sína hugmynd og í lok smiðjunnar eiga þeir að vera í stakk búnir til að hefja vinnslu viðskiptaáætlunar.

Hugmyndasmiðjan verður sjósett 2. september kl. 17.15 og stendur í 6 vikur. Fyrirlestrar verða haldnir á fimmtudögum kl. 17.15 og vinnusmiðjur á laugardögum milli kl. 10.00 og 13.00. Í lokin verður úthlutað sex hvatningarverðlaunum að upphæð 500.000 kr. hver til þeirra hugmyndasmiða sem þykja hafa unnið best úr sinni hugmynd.

Ekki er greitt fyrir þáttöku í Hugmyndasmiðjunni. - ATH. Takmarkað sætaframboð.

Umsóknum skal skila rafrænt á www.hugmyndahus.is - Einnig má senda fyrirspurnir á hugmyndasmidjan@hugmyndahus.com

Sjá nánar viðhengi: Hugmyndasmidjan 2010

Hugmyndahús háskólanna er samstarfsverkefni Listaháskóla Íslands og Háskólans í Reykjavík.

Reykjavík Dance Festival og Samtök um danshús á Íslandi í samstarfi við leiklistar- og dansdeild Listaháskóla Íslands og Félag íslenskra listdansar kynna:

Málstofa um tilgang og ávinning af starfsemi Dansverkstæðis í Reykjavík fyrir listirnar og samfélagið verður haldin föstudaginn 3. september kl. 12.00-13.30 á Fosshóteli Baróni, Barónsstíg 2-4.

Framsögumenn í málstofu verða:

John Ashford - Fráfarandi leikhússtjóri Robin Howard leikhússins í London og stjórnandi hinnar alþjóðlegu danshátíðar Aerowave.
Anna Teuwen - Dramatúrg og framleiðandi við Kampnagel Internationale Kulturfabrik GmbH í Hamborg í Þýskalandi.
Carine Meulders - Listrænn stjórnandi wpZimmer Dansverkstæðisins í Antwerpen í Belgíu.
Halla Ólafsdóttir - Sjálfstætt starfandi dansari og danshöfundur.

Að erindunum loknum verða pallborðsumræður og eru gestir hvattir til að taka til máls. Í kjölfarið verður gestum boðið að skoða húsarkynni Dansverkstæðisins að Skúlagötu 28, Gömlu Frón kexverksmiðjunni.

Alþjóðlega leiklistarhátíðin LÓKAL verður haldin í Reykjavík dagana 1. til 5. september n.k. en Listaháskólinn er meðal samstarfsaðila hátíðarinnar.

Hátíðin er nú haldin í þriðja sinn og að þessu sinni er lögð sérstök áhersla á nýjar og spennandi leiksýningar frá Norðurlöndunum. Einnig verður boðið upp á listamannaspjall eftir sýningar og haldið málþing um nýjustu strauma og stefnur í norrænu leikhúslífi.

Eru allir áhugamenn um leikhús og listir hvattir til þess að gefa þessum frábæru norrænu listamönnum góðan gaum og skella sér í leikhús fyrstu helgina í september!

Eftirtaldir leikhópar eru gestir LÓKAL 2010:

TEATER FAAR 302  (Kaupmannahöfn)

Danir sýna Dværgen, kraftmikla leiksýningu byggða á sögu Pär Lagerkvist. Leikstjórinn er íslenskur, Egill Heiðar Anton Pálsson. Verkið er unnið í samstarfi við norska leikhópinn Værk Produksjoner.

DE UTVALGTE  (Ósló)

Frá Noregi kemur sýningin Drømmen, sem fjallar um örlagarík kynni ungs manns og eldri konu í hjólhýsi á yfirgefnum tennisvelli. Sýningin byggir að nokkru leyti á sönnum atburðum og er sjónrænt meistaraverk.

TEATR WEIMAR  (Malmö)

Svíar leggja hátíðinni til sýninguna Ibsen dekonstruktion 1 - Gengangere, en í þeirri leika tveir ungir menn, magnaða útgáfu af „Afturgöngum” Ibsens. Þeir

eru skeggjaðir, annar þeirra er í síðkjól og leikmyndin er slitinn chesterfieldsófi og fortjöld í 19. aldar stíl.

NYA RAMPEN  (Helsinki)

Þessi finnski leikhópur fékk ekki leyfi til þess að setja upp leikritið „Undantekningin og reglan” eftir Brecht og ákvað því að gera sína eigin útgáfu af verkinu sem þau kalla Undantaget. Þetta er spennandi og skemmtileg úttekt á Brecht og möguleikum ungs fólks til þess að hafa áhrif á gang heimsins. Ekki má gleyma tónlistinni sem er hreint frábær!

KVISS BÚMM BANG  (Reykjavík)

Hið óviðjafnanlega þríeyki, sem þekkt er fyrir lífstílsviðburði á borð við „Get a Life” og „The Norm Olympics” setur á svið fund fulltrúa helstu iðnríkja heims. Viðburðurinn kallast The Great Group of Eight en engir áhorfendur eru að honum, aðeins áhugasamir þátttakendur! Fundurinn verður haldinn á Hótel Sögu.

16 ELSKENDUR (Reykjavík)

Fyrir nokkru síðan settu forvitnir Íslendingar, sem mynda leikhópinn 16 elskendur, sig í samband við fjármálasnillinga frá Nígeríu. Útkoman úr samskiptum þeirra varð leiksýning sem þau kalla Nígeríusvindlið. Getur verið að skáldskapur sé í raun helsti drifkrafturinn í mannlegum samskiptum?

Sérstakir gestir LÓKAL 2010 eru RIMINI PROTOKOLL (Berlín), en þar er á ferðinni einn kunnasti leikhópur Evrópu. Þau vinna ekki með hefðbundnum leikurum, heldur „venjulegu” fólki. Sýning þeirra, Black Tie, er magnað „heimildaleikhús” um hinar ýmsu hliðar ættleiðinga. Rimini Protokoll hlaut evrópsku leiklistarverðlaunin 2008.

Nánari upplýsingar um dagskrána og sýningarnar er að finna á  www.lokal.is

LÓKAL - alþjóðleg leiklistarhátíð í Reykjavík er rekin af Lókal - leiklistarhátíð ehf í samstarfi við eftirtalda aðila: Mennta- og menningarmálaráðuneytið, Reykjavíkurborg, Nordisk Kulturfond, Iceland Express, Þjóðleikhúsið, Borgarleikhúsið, Listaháskóla Íslands, Iðnó, Norræna húsið og Hótel Sögu.

Mánudaginn 23. ágúst hófst kennsla í Listaháskólanum en skólinn hefur nú tólfta starfsár sitt. Nemendur í vetur verða alls um 480, og hafa aldrei verið fleiri.

Nýnemum var boðið á kynningu í deildum þar starfsemi skólans var kynnt fyrir þeim og var eftirvænting í loftinu. Um 180 nýnemar hefja nám við Listháskólann í haust, og eru þeir teknir inn í fimm deildir skólans, þ.e. leiklistar- og dansdeild (35), tónlistardeild (32), hönnunar- og arkitektúrdeild (54), myndlistardeild (27), og listkennsludeild (34).

Í lok dags var skólinn settur formlega við hátíðlega stemningu við húsnæði skólans í Laugarnesi en þar voru mættir nemendur, kennarar og starfsfólk til að gera sér glaðan dag. Rektor ávarpaði gesti og minntist sérstaklega á hve táknrænt það væri að skólinn skyldi nú settur undir beru lofti  þar sem skólastarf er enn dreift vítt og breitt um borgina, og fyrirætlanir um nýja skólabyggingu hafa ekki enn ræst. Biðin eftir nýju skólahúsnæði hefur verið löng og það hlýtur að vera öllum kappsmál, ekki bara nemendum og starfsfólki skólans, að skólinn komist undir eitt þak og verði aflgjafi í þeirru hringiðu sem nútímaborgarmenning er.

Að loknu ávarpi rektors var boðið var upp á kakó, heimagerðar veitingar og ljúfa tónlist í flutningi nemendahljómsveitarinnar Orphic Oxtra.

Knock on Unpainted Wood heitir nýjasta verk danska dansflokksins Mute Company sem frumsýnt verður 27. ágúst s.l. í Kaupmannahöfn. Í verkinu dansar nemandi dansbrautar Listaháskóla Íslands, Marie Handeland, en hún hefur verið á nemendasamningi hjá flokknum síðan í maí s.l.

Verkið er fyrsti hluti í tríológíu um hagkerfi undirheimanna: kynlíf, vopn og eiturlyf. Sýnt er í nýju danshúsi dana, Dansehallerne, sem fyllir allar gömlu Calsberg bjórverksmiðjurnar.

Danshöfundar: Kasper Ravnhøj og Jacob Stage í samvinnu við dansara verksins
Dans: Kasper Ravnhøj, Jacob Stage, Tiziana Fracchiolla, Maxim-Jo Beck McGosh, Thomas Bentin og Marie Bergby Handeland
Lifandi tónlistarflutningur: The Fleas (Pchelki), polsk band: Marta Rogalsdóttir (vocal, fløjter), Pawel Rychert (keyboards, electronica) og Whistler Rogalsson (bas)
Leikmynd: Johan Kølkjær
Ljósahönnun: Michael Breiner
Búningahönnun: Anne Hübertz Brekne
Dramatúrg: Louise Hyun Dahl
Framkvæmdarstjóri: Jacob Bjerregaard
Tæknistjóri: Nuno Antonio Neto
Markaðssetning: Ulla Katrine Friis

RTVR - Fyrirlestur í Opna Listaháskólanum - fimmtudaginn 26. ágúst kl. 12.00 í Skipholti 1, stofu 113

RVTR

RVTR er arkitektastofa frá Kanada sem hlotið hefur fjölda viðurkenninga frá stofnun árið 2007.  Stofnendur eru Geoffrey Thün, Kathy Velikov og Colin Ripley.  Í vinnu sinni leggja þau áherslu á að tengja þverfaglegar akademískar rannsóknir og arkitektúr með yfirfærslu á tækni og eflingu framsækinnar sjálfbærrar hönnunar.

RVTR vinnur að þróun á heildrænum kerfisbundnum aðferðum sem hugsa upp á nýtt sjálfbæra nálgun að breiðum og margþættu sviðum hins byggða umhverfis.  Núverandi verkefni stofunnar eru m.a. skipulagsverkefni um endurnýjanlega orku og háhraða-ferðamöguleika fyrir landsvæðið í námunda við Vatnahéruð Kanada (Great Lakes Megaregion), sérhönnun íbúðarhúsnæðis knúnu sólarorku til fjöldaframleiðslu fyrir norðlægar slóðir og rannsóknir á áhrifum loftlags á byggingahluta og byggingatækni.

RVTR hlaut Young Architects Forum Award í New York árið 2008 og árið 2009 hlaut stofan Professional Prix de Rome in Architecture frá  Canada Council for the Arts. Árið 2010 fékk stofan viðurkenningu fyrir North House Project frá Arkitektafélagi Ontario og Research + Design Award frá tímaritinu Architecture Magazine. Rannsóknarvinna RVTR er m.a. styrkt af Orkuráðuneyti Bandaríkjanna (US Department of Energy), Orkustofnun Ontario (The Ontario Power Authority) og Rannsóknasjóði félags- og hugvísinda í Kanada (Social Sciences and Humanities Council of Canada).

RVTR hlaut ferðastyrk frá Canada Council Professional Prix de Rome in Architecture til að kynna sér sjálfbæra hönnun íbúðarhúsa og skipulags á norðlægum slóðum og eru af því tilefni nú á Íslandi.  Í starfi sínu lítur RVTR til menningarlegra og félagslegra þátta jafnt sem tækninýjunga og orkunýtingar sem áhrifaþátta á nýja tegund byggingariðnaðar sem hefur sjálfbæra þróun til framtíðar að leiðarljósi.

RVTR                  www.rvtr.com

RVTR is a research - based professional architectural practice with a specific agenda to advance linkages between interdisciplinary academic research and the architectural profession, through technology transfer and other means, as well as to realize leading-edge sustainable works of the built environment. RVTR was founded in 2007 by partners Kathy Velikov, Geoffrey Thün and Colin Ripley and currently operates with offices in Toronto, Canada and Ann Arbor, Michigan. Central to the work of RVTR has been a growing area of concentration in the development of holistic systems-based strategies for re-thinking sustainable approaches to a range of broad and complex topics. Current projects address a regional planning strategy for high speed mobility and renewable energy production in the Great Lakes Megaregion, the development of high performance mass-customize solar housing communities for northern climates and research into climatically responsive building component assemblies.

RVTR was awarded the Young Architects Forum Award in 2008 by the Architectural League of New York, and received the 2009 Professional Prix de Rome in Architecture from the Canada Council for the Arts. In 2010 The Ontario Association of Architects recognized RVTR’s seminal North House Project with an Award of Design Excellence and the project has also received a 2010 Research + Design Award from Architecture Magazine. RVTR’s design research is currently funded by the US Department of Energy and NREL, The Ontario Power Authority (OPA), MITACS Accelerate Ontario, NRCan, and the Social Sciences and Humanities Council of Canada (SSHRC).

RVTR is currently undertaking travel funded by the Canada Council Professional Prix de Rome in Architecture to extend their design research on sustainable northern housing and urbanization and facilitate dissemination of their design work to an international audience. During the summer of 2010, firm directors will study the methods used by mass-customized prefabrication industries in Japan and they will investigate traditional and emerging technologies, buildings and communities for living in cold climates, particularly in Iceland, Norway, Sweden, Finland, Germany, Denmark and the Netherlands, as well as to visit the 2010 Solar Decathlon Europe in Madrid. According to RVTR, “cultural and social constructions, as well as technological advancements and energy performance, will shape the development of a new sustainable housing industry leading the way to a higher quality of life for a broad range of constituents.”

Viðhorfskönnun fyrrum nemenda Listaháskóla Íslands sem útskrifuðust árin 2004 og 2007 frá Listaháskólanum.

Í apríl var gerð viðhorfskönnun meðal fyrrum nemenda Listaháskólans sem útskrifuðust árin 2004 og 2007 frá skólanum.  Sambærileg könnun var gerð á síðasta skólaári á útskriftarhópum 2003 og 2006. Kannað var hvernig nám við Listháskólann hefur nýst fyrir framhaldsnám og störf ásamt því að skoða viðhorf útskrifaðra nemenda gagnvart skólanum. Niðurstöður benda til að fyrrverandi nemendur eru almennt mjög jákvæðir í garð Listaháskólans.

Markmið viðhorfskönnunarinnar var meðal annars að skoða nám og störf útskrifaðra en talið er að slík þekking geti nýst til að meta starf skólans. Þetta er í annað skiptið sem slík könnun er lögð fyrir og er ætlunin að framkvæma hana árlega.

Teknir voru fyrir tveir útskriftarhópar, að þessu sinni hópar sem luku námi árin 2004 og 2007. Þátttakendur voru beðnir um að leggja mat á námið í  Listaháskóla Íslands og taldi 85% þátttakenda að námið hafa nýst þeim vel í verkefnum og störfum. Þeir voru einnig beðnir um að taka afstöðu til fullyrðinga um Listaháskólann sem mennta- og menningarstofnun og þar kom meðal annars fram að rúmlega 80% þátttakenda taldi að Listaháskólinn efli framsækna hugsun í listum og menningu í samfélaginu.  Rúmlega helmingur útskrifaðra hafa haldið í frekara nám eða framhaldsnám eftir að hafa lokið námi frá Listaháskólanum.

Hér er hægt er að nálgast niðurstöður viðhorfskönnunarinnar  -  könnun meðal útskrifaðra 2004 og 2007

Tinna Gunnarsdóttir vöruhönnuður hefur verið ráðin fagstjóri í vöruhönnun við hönnunar- og arkitektúrdeild Listaháskólans frá og með 1. ágúst.  Fimm umsóknir bárust um starfið.  Tinna lauk BA prófi í þrívíðri hönnun frá West Surrey College of Art and Design á Englandi 1992 og MA prófi í iðnhönnun frá Domus Academy í Mílanó á Ítalíu 1997.

Tinna er reyndur hönnuður með fölbreytta starfsreynslu og með sterka listræna sýn.  Tinna hefur sýnt verk sín á fjölmörgum sýningum vítt og breitt um heiminn, sjálf staðið fyrir rekstri myndlistar- og hönnunargallerís um þriggja ára skeið, og jafnframt verið sýningarstjóri á miklvægum sýningum. Hún hefur staðið fyrir framleiðslu og dreifingu á eigin vöru jafnt innanlands sem erlendis.