Listaháskólinn er sjálfseignarstofnun, stofnaður 21. september 1998. Kennsla hófst haustið 1999. Skólinn starfar í fimm deildum: myndlistardeild, hönnunar-og arkitektúrdeild, leiklistardeild, listkennsludeild og tónlistardeild. Boðið er upp á nám til fyrstu háskólagráðu. Auk þess er meistaranám í tónsmíðum í tónlistardeild og listkennslu í listkennsludeild. Diplómanám fyrir unga hljóðfæraleikara er einnig í boði. Skólinn stefnir að meistaranámi á öllum fræðasviðum á næstu árum.

Hlutverk
Efla framsækna hugsun í listum og menningu og örva hvers konar nýsköpun og þróun á öllum sviðum. Skólinn veitir listmenntun á háskólastigi og miðlar til samfélagsins þekkingu og fagmennsku í listum. Hann starfar í alþjóðlegu umhverfi og miðar sig við þá skóla í nágrannalöndunum sem þykja skara fram úr í listrænum efnum.

Gildi
Í allri starfsemi og viðfangsefnum eru þrjú megingildi sem stýra viðhorfum okkar og nálgun: Forvitni, skilningur, áræði. Listaháskólinn kynnir sig sem vettvang fyrir nútímalega listsköpun og samfélag þar sem áhersla er lögð á að skerpa sköpunargáfu nemenda. Með starfsemi sinni vill hann taka virkan þátt í þjóðlífinu og tengja um leið íslenskan menningargrunn alþjóðlegu umhverfi lista og menningar með fjölbreyttum nemendahópi og samstarfi við erlenda listaháskóla.