Automatic translation by Google Translate.We cannot guarantee that it is accurate.
Skoða vefinn á ÍslenskuAlþjóðleg samstarfsverkefni
Stefnumiðað samstarf Listaháskólans við erlenda samstarfsháskóla stuðlar að þróun náms, kennslu og rannsókna í alþjóðlegu samtali. Skólinn leggur áherslu á náið samstarf á breiðu fagsviði við tiltekna háskóla. Í því felst þátttaka í verkefnum um þróun á námi og kennslu, alþjóðlegum rannsóknarverkefnum, samtal um gæðamál og bætta stjórnsýslu, gestakennsla og fjölbreyttar leiðir til nemendaskipta.
Núverandi Erasmus+ verkefni
2020-2022
Titill verkefnis: Dómur gegn plasti: ný vídd í list- og hönnunarnámi (e. Plastic Justice: a new dimension in art and design education)
Verkefnisstjóri: Listaháskóli Íslands
Styrkur: €197.644 til 24 mánaða
Markmiðið með verkefninu er að rannsaka hvernig grafísk hönnun og sjónrænar samskiptaleiðir geta varpað ljósi á alvarleika mengunar vegna örplasts í umhverfinu. Með verkefninu er kennurum, sérfræðingum, aðgerðasinnum og stefnumótunaraðilum stefnt saman með því markmiði að skapa kennslugögn og aðferðir, samræður og hönnunarefni sem eykur umhverfisvitund og þekkingu nemenda á langtíma heilsuáhrif og áhættum sem fylgja örplastsvandamálinu.
2020-2023
Titill verkefnis: Pedagogy of Imaginative Dialogues
Verkefnisstjóri: Hanzehogeschool Groningen
Styrkur: €334.391 til 36 mánaða
Hugmyndin á rætur sínar í því að samhliða aukinni lýðræðisvæðingu í Evrópu hefur öfgahreyfingum vaxið fiskur um hrygg ásamt útlendingaandúð og hugmyndum um afturhvarf til kúgandi einræðis og forsjárhyggju í siðferði. Í verkefninu verður unnið að því að þróa aðferðir fyrir myndlistarnám sem byggja á samtali og tengslum ólíkra skoðanna. Meistaranemar í listkennslu ásamt kennurum úr háskólunum munu ferðast á milli landanna og vinna með ólíkum samstarfsaðilum á hverjum stað fyrir sig og þessar aðferðir reyndar og þróaðar. Samstarfsaðilar á Íslandi eru Fjölbrautarskólinn í Breiðholti, Borgarbókasafn og Gerðuberg. Útkoma verkefnis verður í formi fræðigreina og kennsluefnis sem og nýrra námskeiða í kennaramenntun.
2019-2022
Titill verkefnis: Alexandria Nova
Verkefnisstjóri: Hochschule für Schauspielkunst Ernst Busch Berlin
Styrkur: €330.248 til 36 mánaða
Verkefninu er ætlað að vekja athygli á og þróa kennsluaðferðir sem notaðar eru í námi í leikstjórn. Þetta verður gert í samtali kennara og nemenda á námskeiðum, málþingum og fundum. Reynslu, æfingum, hugmyndum og aðferðum verður safnað saman og miðlað í gegnum nýjan vef, greinasafni og bók.
2018-2020 (framlengt til 2021)
Titill verkefnis: Listsköpun og samvinna: Leiðir að virkni og velferð
(e. Social Inclusion and Well-being through the Arts and Interdisciplinary Practices)
Verkefnisstjóri: Listaháskóli Íslands
Styrkur: €204.855 til 24 mánaða
Verkefnið snýst um að þróa námsefni og námskrá að nýrri námslínu á meistarastigi við listkennsludeild Listaháskóla Íslands í samstarfi við háskóla í Evrópu. Námið er sniðið að listamönnum sem hefur áhuga á að styrkja félagslega þátttöku, virkni og vellíðan einstaklinga í sínum störfum. Unnið verður að því að kanna möguleika ólíkra listgreina til að tengja saman einstaklinga, stuðla að virkni og vellíðan, og efla sjálfstraust þeirra sem eru í hættu á að verða jaðarsettir.
2018-2020 (framlengt til 2021)
Titill verkefnis: Beyond Art Disciplines
Verkefnisstjóri: Stockholms Konstnärliga Högskola
Styrkur: €188.022 til 24 mánaða
Markmið verkefnisins er að nýta markvisst þverfaglegt og fjölþjóðlegt samtal til þróunar á kennsluháttum þar sem kjarninn er samvinna og sköpun. Nemendur, kennarar, starfsfólk háskóla og listamenn mynda saman námssamfélag þar sem ný þekking og skilningur verður til í virku þverfaglegu samtali. Þróað verður þverfaglegt námskeið í listum og námsefni því til stuðnings.