Fimmtudaginn 15. janúar stíga sigurvegarar í einleikarakeppni Sinfóníuhljómsveitar Íslands og Listaháskóla Íslands á svið í Eldborgarsal Hörpu.
Árlega fer fram keppni ungra einleikara sem Listaháskóli Íslands stendur að í samvinnu við Sinfóníuhljómsveit Íslands. Keppnin er opin tónlistarnemendum á fyrsta háskólastigi, óháð því hvaða tónlistarskóla þeir sækja. Í ár valdi dómnefndin fjóra sigurvegara til að koma fram með Sinfóníuhljómsveitinni.
Þau eru:
Baldvin Oddsson, trompet
Erna Vala Arnardóttir, píanó
Lilja María Ásmundsdóttir, píanó
Steiney Sigurðardóttir, selló
Það er stór stund þegar vinningshafar stíga á svið með hljómsveitinni en á þessum tónleikum ríkir ávallt gleði yfir þeim krafti sem býr í hinu unga tónlistarfólki. Sinfóníuhljómsveitin og Listaháskóli Íslands leiða saman hesta sína og styðja við okkar efnilegasta tónlistarfólk á leið þess inn í heim atvinnumennskunnar. Á sama tíma fá áheyrendur tækifæri til að fylgjast með þroska og framförum þessa unga listafólks.
Einleikarar og efnisskrá:
Baldvin Oddsson
Consertino eftir André Jolivet
Erna Vala Arnardóttir
Píanókonsert í a-moll eftir Robert Schumann
Lilja María Ásmundsdóttir
Píanókonsert í G-dúr eftir Maurice Ravel
Steiney Sigurðardóttir
Sellókonsert í e-moll eftir Edward Elgar
Stjórnandi tónleikanna er norski hljómsveitarstjórinn Torodd Wigum, staðarhljómsveitarstjóri Sinfóníuhljómsveitarinnar í Þrándheimi og fyrrum aðstoðarhljómsveitarstjóri Fílharmóníusveitarinnar í Bergen.
Tónleikarnir verða fimmtudaginn 15. janúar í Eldborgarsal Hörpu og hefjast kl. 19:30.
Miðasala er hafin á harpa.is og á sinfonia.is