Út er komin bókin Merki & form eftir hönnuðinn Gísla B. Björnsson. Gísli kenndi við braut grafískrar hönnunar um árabil og er brautryðjandi hér á landi á sviði merkjahönnunar. Í bókinni er að finna umfjöllun Gísla um sögu merkjahönnunar auk þess sem hann ræðir um táknfræði, starf hönnuðarins, skjaldamerkjafræði, litanotkun, leturnotkun og ýmislegt fleira sem viðkemur merkjahönnun.
Áratugahönnun
Hryggjarstykki bókarinnar eru skissur af teikniborði Gísla þar sem hann vinnur út frá ákveðnum táknum og hugmyndum. Sú vinna hefur í gegnum árin skilað af sér tugum merkja sem mörg eru vel þekkt. Bókin gefur þá einnig ágætt yfirlit yfir þau merki sem Gísli hefur hannað á löngum ferli.
Ritstjóri bókarinnar er Bryndís Björgvinsdóttir, lektor við deild hönnunar og arkitektúrs. Aðfararorð skrifar Birna Geirfinnsdóttir fagstjóri í grafískri hönnun. Hönnuður verksins er Ármann Agnarsson ásamt Helga Páli Melsted. Bókin Merki & form er hvoru tveggja verk sem hægt verður að nýta til kennslu við Listaháskólann sem og gagnlegt rit fyrir alla þá sem hafa áhuga á táknum, merkjum, formum – auk þess að gefa yfirlit yfir fimm áratuga hönnunarvinnu og reynslu Gísla B. Björnssonar af merkjahönnun hér á landi. Háskólaútgáfan og Listaháskóli Íslands gefa bókina út og hún fæst meðal annars hjá Háskólaútgáfunni í kjallara aðalbyggingar Háskóla Íslands.