Gunnar Ingi, meistaranemi í söng- og hljóðfærakennslu

Tónlistarmaðurinn Gunnar Ingi Jósepsson, er meistaranemi í söng- og hljóðfærakennslu.

Gunnar Ingi var ungur að árum þegar hann hóf að fást við tónlist. „Ég hef verið að fást við tónlist alveg síðan ég var sex ára þegar ég byrjaði fyrst í tónlistarskóla. Þá lærði ég á píanó en ég færði mig svo yfir á klassískan gítar tveimur árum síðar,“ segir Gunnar Ingi.

Á táningsárunum byrjaði hann svo í sinni fyrstu hljómsveit og fór þá að skapa tónlist með vinum og hefur hann ekki hætt síðan.

„Ég flutti svo suður 2014 til þess að fara að læra á rafmagnsgítar í FÍH en ég byrjaði einnig í hljómsveit hér fyrir sunnan á svipuðum tíma og svo var ég að vinna í hljóðfæraversluninni Rín “ segir Gunnar en hann hóf nám við tónlistardeild LHÍ árið 2019 og útskrifaðst með bakkalárgráðu í rytmískri hljóðfærakennslu vorið 2022.

„Upphaflega skráði ég mig í LHÍ vegna þess að ég þurfti að tilbreytingu í líf mitt. En á þeim tíma var það annað hvort að flytja út á land og sækja um vinnu sem tónlistarkennari eða fara fyrst í tónlistarkennaranám. Ég kaus það síðara og gæti ekki verið sáttari með þá ákvörðun,“ segir Gunnar en hann ákvað að halda áfram námi eftir bakkalárinn.

„Ég skráði mig svo beint í meistaranám í söng- og hljóðfærakennslu eftir útskrift enda var ég ekki alveg til í að vera búinn í skóla þá. Ég upplifði strax á þegar ég byrjaði í LHÍ að hér eru nemendur ekki bara tölur á blaði heldur persónur sem skipta miklu máli fyrir skólann alveg eins og skólinn skiptir máli fyrir okkur nemendur,“ segir Gunnar Ingi.

„Ég hef eignast mikið af vinum og kunningjum í gegnum skólann og það er ekki bundið aðeins við nemendur held einnig kennara og stjórnendur. Það er líklega eitt það sterkasta sem þessi skóli býður upp á er þetta jákvæða námsumhverfi þar sem kennarar, stjórnendur og nemendur eiga góð samskipti sín á milli og bera virðingu fyrir hvert öðru.“

Gunnar Ingi stefnir að útskrift á vorönn en hann ákvað að fara MT leiðina í náminu, þ.e. útskrifast úr meistaranáminu með meistaragráðu og kennsluréttindi en án þess að vinna lokaverkefni og taka þess í stað fleiri námskeið.

„Ég ákvað að fara MT leiðina þar sem það hentar mér mun betur. Ég mun nýta námið í tónlistarkennarastarfið en mjög mikið af því sem ég læri í LHÍ nýtist mér einnig í eigin tónlistarsköpun og vinnu,“ segir Gunnar en það eru spennandi tímar framundan hjá verðandi tónlistarkennaranum.

„Ég er búinn að ráða mig í starf tónlistarkennara á Blönduósi næsta vetur og hlakka ég mikið til að byrja að vinna sem tónlistarkennari í fullu starfi. Ásamt því er ég einnig að fara að gefa út meiri tónlist með hljómsveitunum mínum Skyfolk og Proxanity.“