Meistaranemar hvattir til rannsókna í skapandi greinum

Rannsóknasetur skapandi greina (RSG) auglýsir í annað sinn styrki til meistaranema sem vinna lokaverkefni um atvinnulíf menningar og skapandi greina og áhrif slíkrar starfsemi á samfélag og efnahag. Umsóknafrestur er til 13. september  og áætlað að styrkja 2-3 nemendur um alls 1,2 milljónir króna. Miðað er við að fyrir 60 ECTS eininga verkefni sé styrkupphæð 800 þúsund krónur og 400 þúsund krónur fyrir 30 ECTS einingar. Umsækjendur þurfa að stunda meistaranám við viðurkenndan háskóla, hvort sem er á Íslandi eða erlendis, og verkefnið þarf að fjalla um eða hafa tengingu við íslenskt samfélag.

Fyrsta úthlutun úr meistaranemasjóði RSG fór fram í vor en þá hlutu tveir nemendur styrki til að vinna rannsóknir sínar, annars vegar á áhorfendaþróun í sviðslistum og hins vegar á gengi íslenskra kvikmynda á evrópskum mörkuðum. Niðurstöður rannsóknanna voru kynntar á málþingi RSG í júní síðastliðnum, þar sem hagnýtingargildi nemendarannsókna var til umfjöllunar. Hægt er að horfa á málþingið í heild sinni og hvert erindi fyrir sig á Vimeo síðu RSG. Áætlað er að kynna á sambærilegan hátt niðurstöður annarra rannsókna sem styrktar verða af meistaranemasjóði rannsóknasetursins.

Rannsóknir á þessu sviði geta byggt á ólíkum fræðigreinum og ýmiskonar aðferðafræði. Flestar greinar félagsvísinda hafa til að mynda tengingu við atvinnulíf menningar og skapandi greinar. Eftirfarandi eru dæmi um viðfangsefni sem eru tengjast rannsóknastefnu RSG en listinn er alls ekki tæmandi.

• Útflutningstekjur af menningu og skapandi greinum (t.d. aðferðafræði, gögn og aðgengi)
• Gervigreind og áhrif hennar á skapandi greinar (t.d. störf sem hverfa og ný störf sem verða til, menningarleg áhrif fyrir lítið málsvæði sem Ísland, skapandi tækni og breytingar á framleiðsluumhverfi)
• Ólaunuð vinna í menningu og skapandi greinum (t.d. sjálfboðaliðastörf, greiðar og vinnuskipti, o.þ.h.)
• Starfsumhverfi listamanna (t.d. vinnutími, ólaunuð verkefni, kaup og kjör, vinnuaðstæður)
• Áhrif menningar og skapandi greina á nýsköpun
• Hlutverk menningar og skapandi greina í byggðaþróun
• Þverfaglegt hlutverk skapandi greina

Við hvetjum áhugasöm eindregið til að hafa samband ef einhverjar spurningar vakna. Frekari upplýsingar um umsóknaferli og matsatriði má nálgast á https://www.rssg.is/meistaranemasjodur.

Mynd: Júlíus Jóhannesson kynnir rannsókn sína á málþingi RSG í vor. Júlíus var annar tveggja sem hlaut styrk úr meistaranemasjóði RSG í apríl 2024.