Nýr deildarforseti í arkitektúr við LHÍ

Í vikunni sem leið var tilkynnt að Massimo Santanicchia hafi verið ráðinn deildarforseti í arkitektúr við Listaháskóla Íslands að undangengnu ráðningarferli.

Doktor Massimo er arkitekt, borgarfræðingur og prófessor í arkitektúr. Hann hefur starfað við Listaháskóla Íslands síðan 2004. Fyrst sem stundakennari og síðar lektor, dósent og prófessor. Hann hefur sinnt fagstjórn í BA námi og meistaranámi. Í ágúst 2022 var Massimo kjörinn meðlimur stjórnar European Association of Architectural Education (EAAE).

Rannsóknir Massimos byggja á fræðum um réttlæti, ríkisborgararétt, femínisma, póst-húmanisma og heimsborgaratrú til að endurskoða arkitektamenntun og framkvæmd hennar í íslensku samhengi og víðar.Hann hefur verið að þróa kenninguna um Cosmopolitan Citizenship Architecture Education (CCAE), líkan sem mun skapa endurnýjaðan skilning á hlutverkum og ábyrgð hönnuða gagnvart sameiginlegu félagslegu og vistfræðilegu umhverfi okkar. Rannsóknir hans eru innblástur þema ACSA/EAAE kennararáðstefnunnar 2023 sem fram fer í Reykjavík í júní 2023.
Massimo er með MArch frá Istituto Universitario di Architettura di Venezia; MA í borgarfræðum frá Architectural Association, School of Architecture í London; MSc í borgarskipulagsfræðum frá London School of Economics and Political Science; og doktorsgráðu í menningarfræðum og menntun og fjölbreytileika frá Háskóla Íslands.