Fornafn: 
Atli Ingólfsson

Atli Ingólfsson stundaði tónsmíðanám hjá Þorkeli Sigurbjörnssyni og Atla Heimi Sveinssyni við Tónlistarskólann í Reykjavík þaðan sem hann útskrifaðist 1984. Á árunum 1985 - 1988 stundaði hann nám í tónsmíðum hjá Davade Anzaghi við Konservatoríuna í Mílanó, hann sótti einkatíma í tónsmíðum hjá Gérard Grisey á árunum 1988 - 1990 í París og sótti einnig sumarnámskeið í Siena (1988) og við IRCAM í París (1992). Hann var um árabil búsettur á Bologna á Ítalíu þar sem hann starfaði nánast eingöngu við tónsmíðar. Árið 2006 flutti Atli aftur til Íslands og hefur síðan sinnt kennslu meðfram tónsmíðum. 

Verk Atla skipta tugum og eru af öllu tagi: Einleiksverk, kammerverk, söngverk, hljómsveitarverk, konsertar og óperur. Þau hafa verið pöntuð og flutt víða um Evrópu en meðal þeirra sem hafa flutt þau eru Ensemble Intercontemporain, Ensemble l’Itinéraire, Les percussions de Strasbourg, Arditti kvartettinn, Oslo Sinfonietta, Symphoniorchester des Bayerischen Rundfunks, Orchester des Staatstheaters Cottbus, Avanti Chamber Orchestra, að ónefndum innlendum flytjendum eins og Caput og Sinfóníuhljómsveit Íslands.

Casa Ricordi útgáfan í Mílanó hefur gefið nokkur verka Atla út á nótum og fjöldi þeirra hefur komið út á geisladiskum á Íslandi, Frakklandi, Ítalíu og Þýskalandi, en hjá BIS útgáfunni í Stokkhólmi kom út diskur helgaður verkum hans árið 2005.

Atli hefur ritað fjölda greina um tónlist og menningu og hafa þær meðal annars birst í Fréttablaðinu, Skírni og Þráðum (tímarit tónlistardeildar LHÍ) en auk þess gefið út Hljómamál, kennslubók í hljómfræði.
Nánar má lesa um starf Atla á ensku á heimasíðunni www.atli-ingolfsson.com

Atli er prófessor og fagstjóri meistaranáms í tónsmíðum við Tónlistardeild LHÍ. 

 

Staða: 
Deild á starfsmannasíðu: