Ráðning deildarforseta í sviðslistum og listkennslu

Una Þorleifsdóttir hefur verið ráðin í stöðu deildarforseta sviðslistadeildar og Ingimar Ólafsson Waage hefur verið ráðinn í stöðu deildarforseta listkennsludeildar. Þau hefja störf sem deildarforsetar við Listaháskólann þann 1. ágúst n.k.

Una Þorleifsdóttir hefur bakkalárgráðu í leikhúsfræðum og list frá Goldsmiths College, University of London og meistaragráðu í leikstjórn og leikhúsfræðum frá Royal Holloway, University of London. Í umsögn hæfisnefndar segir m.a. að hæfisnefnd telji engan vafa leika á því að Una sé í fremstu röð á fagvettvangi sviðslista og hafi samfelldan öflugan listrænan feril auk mikillar kennslureynslu. Una er leiðandi sviðslistamaður með framúrskarandi þekkingu og umfangsmikla reynslu á sínu sérsviði. Hún er virkur rannsakandi í störfum sínum sem leikstjóri og handritshöfundur og hefur birt fræðilega texta um rannsóknir sínar. Una hefur einnig umfangsmikla, alhliða reynslu af akademískum störfum og kennslu á háskólastigi, var háskólakennari við sviðslistadeild frá 2005 – 2022 og fagstjóri sviðshöfundabrautar 2012 – 2022 þar sem hún átti ríkan þátt í að þróa nám brautarinnar. Auk þess hefur Una komið að kennslu í öðrum háskólum hérlendis sem erlendis. Þá var Una starfandi deildarforseti sviðslistadeildar 2020 – 2021.

Ingimar Ólafsson Waage stundaði nám við málaradeild MHÍ og framhaldsnám í myndlist við École Nationale des Beaux-arts de Lyon í Frakklandi. Hann lauk uppeldis- og kennslufræðum fyrir framhaldsskólakennara frá Kennaraháskóla Íslands og M.Ed. í heimspeki og félagsfræði menntunar frá HÍ og leggur um þessar mundir lokahönd á doktorsnám í menntavísindum við HÍ. Í umsögn hæfisnefndar segir m.a. að Ingimar hafi fest sig í sessi sem viðurkenndur rannsakandi á sviði listkennslu með staðgóða þekkingu á sínu sérsviði. Hann er í fremstu röð á innanlandsvettvangi, auk þess að vera virkur á alþjóðavettvangi. Ingimar hefur umfangsmikla reynslu af akademískum störfum og kennslu á háskólastigi og hefur verið lektor við listkennsludeild LHÍ frá 2019 og fagstjóri í sjónlistum og almennri kennslufræði frá 2018, en hann hóf störf hjá LHÍ 2013 fyrst sem stundakennari og síðar sem aðjúnkt. Ingimar hefur jafnframt kennt við HÍ og hefur reynslu af listkennslu bæði á grunn- og framhaldsskólastigi. Ingimar hefur þó nokkra stjórnunarreynslu af vettvangi listkennslu og nýtur trausts í faginu. Hann hefur verið í Kennararáði mennta- og barnamálaráðuneytisins frá árinu 2020, verið formaður kennslunefndar LHÍ og setið í fagráði LHÍ svo fátt eitt sé nefnt. Þá var Ingimar starfandi deildarforseti listkennsludeildar haustið 2021.