Reglur Ungra einleikara

Reglur um keppni um að fá að koma fram á tónleikum með Sinfóníuhljómsveit Íslands sbr. samning dags. 21.12.04, með breytingum sept. 2007, sept. 2010  ág. 2018, sept. 2020 og ág. 2024.

1) Keppnin er árlegur viðburður á vegum Listaháskóla Íslands (LHÍ) og Sinfóníuhljómsveitar Íslands (SÍ). LHÍ er framkvæmdaaðili keppninnar. Keppnin fer fram í tveimur umferðum. Í fyrri umferð eru umsækjendur  metnir eftir innsendum myndbandsupptökum og þeir umsækjendur sem komast áfram eru boðnir í aðra umferð keppninnar. Sigurvegarar koma fram á Tónleikunum Ungir einleikarar sem að öllu jöfnu eru haldnir í apríl.

2) Keppnin er opin nemendum 30 ára og yngri sem stunda nám í hljóðfæraleik eða söng á óháð skólastigi og eru íslenskir ríkisborgarar eða erlendir ríkisborgarar sem hafa verið búsettir á Íslandi í a.m.k. eitt ár. Fyrrum sigurvegarar samkeppninnar eiga ekki möguleika á endurtekinni þátttöku. 

3) Verkefnastjóri tónlistardeildar veitir upplýsingar um keppnina og tekur við umsóknum. Umsóknum skal fylgja staðfesting á að keppendur stundi nám í hljóðfæraleik eða söng þegar að umsókn er skilað inn.  Með umsókn í keppnina samþykkir þátttakandi að hafa kynnt sér reglur hennar og að upplýsingar sem gefnar eru upp, séu réttar og í samræmi við reglur keppninnar. Umsóknum þarf að skila í gegnum rafrænt umsóknarkerfi.

Lýsing á verkefnum:
I) Hljóðfæraleikarar: Einleiksverk með hljómsveit í fullri lengd.
II) Söngvarar: Einsöngsverk með hljómsveit að hámarki 25 mín. 

4) Í fyrri umferð eru umsækjendur  metnir eftir innsendum myndbandsupptökum. Skila má inn upptökum í fyrri umferð keppninnar á tímabilinu 1. sept – 15. október ár hvert. Myndbandsupptökurnar mega vera að hámarki 6 mánaða gamlar. Ekki er nauðsynlegt að flytja alla dagskrána í einni samfelldri töku en hvert tónverk, eða þáttur þarf að vera flutt í einni töku án klippinga. Upptakan verður að sýna keppandann allan tímann.  Umsækjandi sendir hlekk á upptökuna þar sem hún er vistuð, hvort sem að það er á lokaðri Youtube-, eða Vimeo-rás, Dropbox eða Google-drive. Æskilegt er að upptakan sé ekki aðgengileg almenningi á meðan að keppninni stendur. Verkefnavalið miðast við hefðbundna hljómsveitarskipan og leikur meðleikari hljómsveitarpartinn í keppninni.  Niðurstaða úr fyrri umferð keppninnar verður tilkynnt innan við 6 vikum frá umsóknarfresti. Að jafnaði skal 8-10 keppendum boðið að taka þátt í síðari umferð keppninnar. Hún fer fram í byrjun janúar í húsnæði tónlistardeildar LHÍ að viðstaddri dómnefnd. Allur upptökukostnaður og meðleikur í báðum umferðum keppninnar er á ábyrgð og kostnað keppanda. Keppnin er lokuð áheyrendum 

5) Forseti tónlistardeildar LHÍ skipar dómnefnd í samráði við framkvæmdastjóra Sinfóníuhljómsveitar Íslands. Aðalhljómsveitarstjóri Sinfóníuhljómsveitarinnar á sjálfkrafa rétt á setu í nefndinni eða varamaður í hans stað. Enginn dómnefndarmanna má hafa bein tengsl við þátttakendur í keppninni. Miðað er við að í dómnefnd sitji fimm aðilar, en þeim má fjölga til þess að sérþekking um einstaka hljóðfærahópa verði til staðar í nefndinni. 

6) Mat dómnefndar skal byggt á einkunnagjöf. Fyrirkomulag hennar er kynnt fyrir dómnefnd með góðum fyrirvara fyrir keppnina. Falli stigin jafnt fer fram leynileg atkvæðagreiðsla í nefndinni. Atkvæði formanns ræður úrslitum falli stigin aftur jafnt. Úrskurður dómnefndar er endanlegur og óáfrýjanlegur. Dómnefnd getur valið allt að fjóra þátttakendur til að koma fram á tónleikunum. Framkvæmdaaðili keppninnar ákveður röð þátttakenda í keppninni.