Skólasetning Listaháskóla Íslands 2024

Kristín Eysteinsdóttir, rektor skólans bauð í dag nýnema velkomna og ávarpaði:

“Þið eruð fyrstu nýnemar skólans sem greiða ekki skólagjöld. Sannkölluð tímamót enda mikið jafnréttis- og jafnræðismál að nemendur í listum sitji við sama borð og aðrir háskólanemar. 

Ávarp Kristínar Eysteinsdóttur til nýnema má lesa í heild sinni hér fyrir neðan.

Þóra Einarsdóttir, aðstoðarrektor náms og kennslu kynnti fyrir nemendum fagstjóra, deildarforseta ásamt dagskrá nýnemavikunnar.

Hefð er fyrir því að Hollnemi veiti nýnemum innblástur og í ár var það Andrean Sigurgeirsson, dansari og danshöfundur. Hann útskrifaðist úr Listaháskóla Íslands árið 2016 með BA gráðu í samtímadans.

Kæru nýnemar.

Verið hjartanlega velkomin í Listaháskóla Íslands.

Þetta er söguleg stund. Þið eruð fyrstu nýnemar skólans sem greiða ekki skólagjöld. Sannkölluð tímamót enda mikið jafnréttis- og jafnræðismál að nemendur í listum sitji við sama borð og aðrir háskólanemar.

Það er einstakt að standa hér og taka á móti nýnemum, að skynja þessa rafmögnuðu spennu sem fylgir nýrri byrjun.

Ég trúi því að nám við Listaháskóla Íslands sé eitt mikilvægasta verkefnið á sviði menningar í landinu, hér mótast framtíðin.

Þegar ég ávarpa ykkur kæru nýnemar þá langar mig að beina sjónum mínum að krafti listarinnar. Listin er óþrjótandi auðlind. Það er nefnilega sköpunarkrafturinn sjálfur sem um ræðir og hann býr innra með ykkur og við í þessum skóla erum hér til að gefa ykkur samhengi, samtal, rými og verkfæri til að virkja hann.

Sem nemendur í þessum skóla munið þið komast að því hvernig listin getur umbreytt tilfinningum, hugmyndum og upplifunum.

Listin er leið til að skilja og túlka heiminn. Hún gerir okkur kleift að tjá það sem ekki hefur verið sagt og sjá það sem ekki hefur verið séð. Hún skapar nýja hugsun og ný sjónarhorn.

En hún mun krefjast mikils af ykkur því listin blómstar þegar við þorum að spyrja spurninga og kanna ókunn landsvæði.

Umfaðmið leitina, umfaðmið tilraunir og umfaðmið mistök því þar munið þið vaxa. Verið opin fyrir gagnrýni og samtali, verið auðmjúk, leitandi og hugrökk.

Gleymið því ekki að það er miklu mikilvægara að spyrja spurninga en að hafa svör. Þorið að spyrja ykkur sjálf, aðra og heiminn spurninga.

Við lifum í síbreytilegum heimi og þar er hlutverk listarinnar mögulega mikilvægara en nokkru sinni fyrr.

Ég hvet ykkur til að vera opin og njóta leitarinnar sjálfrar, það sem gerist á leiðinni er svo miklu mikilvægara en nokkuð annað því þar á þroskinn sér stað og þar mótist þið sem listamenn.

Listin býr yfir þeim mætti að geta haft varanleg áhrif á heiminn. Þið sem listamenn getið haft varanleg áhrif á heiminn.

Kæru nemendur,

Ég hvet ykkur til að tengjast, tengjast ykkur sjálfum og öðrum, að deila reynslu ykkar og lyfta hvert öðru upp þegar á reynir. Saman komumst við svo miklu lengra en við gerum ein. Leyfið ykkur að hlusta og vera. Leyfið ykkur að prófa ólíka hluti. Leitið að ykkar rödd, ykkar ástríðu, ykkar sjónarhorni og hafið hugrekki til að deila því með okkur og heiminum.

Veturinn framundan er fullur af tækifærum til samstarfs, nýsköpunar og vaxtar. Nýtið ykkur allt sem þessi skóli getur boðið ykkur, vinnustofur, fyrirlestra, sýningar og viðburði.

Listaháskólinn er samfélag, við viljum vera hreyfiafl sem stækkar veruleikann og við trúum því að skapandi hugsun sé forsenda framþróunar. Munið að Listaháskóli Íslands er staður þar sem ímyndunaraflið á sér engin takmörk.

Listin er rannsókn, hún er könnun sem skorar á ykkur að skoða heiminn og ykkur sjálf á nýjan og umbreytandi hátt. Við erum hér til að að virkja og þjálfa hæfni ykkar, hugvit og þekkingu með áherslu á nýsköpun, sjálfstæði, framsækni og fagmennsku.

Til að slíkt sé mögulegt þarf aðstaða skólans að vera framúrskarandi, við róum því öllum árum að því að koma Listaháskólanum undir eitt þak og áætlað er að samkeppni um bygginu nýs Listaháskólans í Tollhúsinu við Tryggvagötu opnist á næstu vikum.

Verið óhrædd við að taka áhættur, mistök eru ómissandi hluti af sköpunarferlinu, þau geta leitt til endurfæðingar og djúpra byltinga. Munið að sérhver listamaður hefur staðið frammi fyrir áskorunum og efasemdum, það sem skiptir máli er hvernig þið bregðist við þeim

Kæru nemendur,

Framundan er stórkostlegt ferðalag þar sem þið munið kynnast undraverðum möguleikum og mætti listarinnar.

Ég hlakka til ferðarinnar með ykkur og segi hér með skólann settann.