Mannauður

Í KRAFTI MANNAUÐS ÞRÓAST SKÓLINN

Samfélag Listaháskólans

Listaháskóli Íslands er skapandi samfélag sem er leiðandi í sköpun og miðlun þekkingar í listum. Hjá Listaháskólanum eru öll störf mikilvægur liður í myndun námssamfélagsins og er öflugur mannauður forsenda þess lifandi og kröftuga starfs sem einkennir skólann.

Starfsmannaval

Leitað er eftir starfsfólki sem sýnir ábyrgð og fagmennsku í starfi, starfar sjálfstætt, sýnir frumkvæði og þróast með þeim breytingum sem verða á starfsumhverfinu. Það sé opið fyrir fjölbreyttum verkefnum og áskorunum, sé lausnamiðað og hafi ánægju af samstarfi.

Meginreglan við ráðningar er að störf eru auglýst laus til umsókna. Um ráðningar, framgang og mat á hæfi akademískra starfsmanna gilda lög um háskóla 63/2006 og reglur Listaháskóla Íslands um veitingu akademískra starfa.

Við móttöku nýs starfsfólks er lögð áhersla á að gera grein fyrir verkefnum, ábyrgðarhlutverki og að styðja við aðlögun að menningu með þeim hætti að starfsfólk njóti sín í starfi frá upphafi.

Jafnrétti

Leitast er við að námssamfélagið sé samansett af fjölbreyttum nemenda- og starfsmannahópi. Listaháskólinn hefur mótað jafnréttisáætlun sem staðfest hefur verið af Jafnréttisstofu.

Listaháskólinn er jafnlaunavottaður vinnustaður og við hann eru í gildi viðbragðsáætlanir við einelti og kynferðislegri og kynbundinni áreitni og ofbeldi.

Starfsþróun

Starf Listaháskólans byggir á sérfræðiþekkingu og færni starfsfólks. Leitast er við að byggja upp þekkingu og hæfni starfsfólks með því að veita tækifæri til starfsþróunar m.a. með starf í fjölbreyttu og alþjóðlegu umhverfi í huga. Stutt er við starfsfólk í gegnum styrktarsjóði, með stuðningi til náms við LHÍ, Eramus starfsþróunaráætlun og reglulegri fræðslu og þjálfun.

Heilsa og vellíðan

Lögð er áhersla á hvetjandi starfsumhverfi sem byggir á traustri og reglulegri endurgjöf, heilsueflandi starfsumhverfi með aðgerðum sem styðja starfsfólk til líkamlegrar og andlegrar ræktunar og góðan starfsanda þar sem lögð er áhersla á tækifæri starfsfólks til samstarfs og samveru með formlegum og óformlegum hætti.

Með sveigjanlegu starfsumhverfi er leitast við að skapa aðstæður sem gera starfsfólki kleift að samræma kröfur starfs og einkalífs eins og kostur er. Til að koma á sanngjarnan hátt til móts við starfsfólk hefur LHÍ mótað reglur um sveigjanleika í starfi og launalaus leyfi sem ætlað er að tryggja jafnræði.

Hjá Listaháskólanum er starfandi öryggisnefnd sem vinnur í samræmi við lög um vinnuvernd.

Samskipti og þátttaka í samfélagi LHÍ

Lögð er áhersla á uppbyggileg samskipti sem einkennast af virðingu. Hjá LHÍ gilda siðareglur sem öllu starfsfólki og nemendum ber að starfa samkvæmt.

Starfsfólki er haldið upplýstu um málefni skólans, er boðin þátttaka í stefnumótun og fengið til samráðs um mál sem varða sérsvið þeirra.

Lögð er áhersla á að starfsfólk hafi gott aðgengi að stjórnendum og sé í vissu varðandi verkefni og ábyrgðarsvið sem því tilheyrir. Starfsmannasamtöl eru haldin minnst einu sinni á ári.

Árleg könnun er lögð fyrir til að mæla viðhorf til starfs, starfsumhverfis og líðan í starfi og hafa niðurstöður hennar áhrif á stefnu í mannauðsmálum hverju sinni.

Starfslok

Starfslok vegna aldurs er við 67 ára en getur í undantekningartilfellum verið síðar. Leitast er við að veita aukinn sveigjanleika þegar nær dregur starfslokum s.s. með lækkuðu starfshlutfalli eða breyttum starfsskyldum.