Námsráðgjöf

Um námsráðgjöf Listaháskóla Íslands

Námsráðgjafi í Listaháskóla Íslands er Ragnhildur Ísleifs Ólafsdóttir  

Ragnhildur er staðsett í Stakkahlíð en fer reglulega í aðrar byggingar skólans og hittir nemendur. Viðvera í öðrum byggingum er auglýst sérstaklega á hverjum stað.  

Nemendur í Listaháskólanum geta bókað viðtal hér http://namsradgjof.lhi.is/. Einnig er hægt að senda tölvupóst á namsradgjof@lhi.is  

ÞJÓNUSTA

Námsráðgjöf er einstaklingsbundin þjónusta sem er fyrst og fremst fyrir nemendur. Boðin eru einstaklingsviðtöl, hópráðgjöf, sálfræðiviðtöl, hádegisfyrirlestrar og þjónusta við nemendur sem þurfa á sértækum úrræðum að halda. Það er á ábyrgð nemenda að upplýsa námsráðgjafa um hamlanir sínar þegar þeir hefja nám við skólann. 

Þjónusta sem er m.a. í boði: 

• Leiðsögn, kennsla og ráðgjöf um bætt vinnubrögð í námi og námstækni 

• Leiðsögn, ráðgjöf og skráning vegna sértækra úrræða í námi 

• Ráðgjöf um líðan og persónuleg málefni 

• Ýmis námskeið s.s. námstækninámskeið, námskeið í hugrænni atferlismeðferð, hópavinnunámskeið og samskipti, námskeið fyrir atvinnuleit.  

• Starfsráðgjöf 

Viðtöl felast meðal annars í því að styðja nemendur og efla þá til árangurs í námi. Jafnframt að aðstoða þá að finna styrkleika sína og áhuga.  

Námsráðgjafi starfar í þágu nemenda og gætir hagsmuna þeirra. Það má tala um allt milli himins og jarðar og er trúnaðar gætt í öllum samtölum. Leitast er við að veita nemendum þann stuðning sem þeir þurfa á að halda hvort sem erindin tengjast því að efla sig og styrkja í námi eða persónulegum erfiðleikum og áföllum. 

Nemendum er bent á að leita til fagstjóra varðandi málefni sem upp koma í náminu sjálfu.  

Deildarfulltrúar veita aðstoð og upplýsingar m.a. um:  

• Einingarfjölda 

• Námsframvindu 

• Kennslufyrirkomulag 

• Skipulag og uppsetningu náms 

• Inntökuskilyrði 

• Breytingar á skráningum  

SÁLFRÆÐIAÐSTOР

Nemendur geta sótt um styrk fyrir sálfræðikostaði hjá Listaháskóla Íslands.   

Til að sækja um styrkinn byrjar þú á því að panta tíma hjá námsráðgjafa.  

STARFSRÁÐGJÖF 

Starfsráðgjöf er ferli þar sem leitast er við að efla einstaklinga í þá átt að þekkja sjálfan sig betur svo þeir geti tekið ákvarðanir um framtíð sína. Því er meginhlutverk starfsráðgjafar LHÍ að aðstoða nemendur við að undirbúa sig fyrir frekari menntun eða atvinnulíf eftir að námi lýkur í LHÍ. Haldin eru stutt námskeið, fyrirlestrar og viðtöl um málefni sem tengjast lífi að loknu námi. 

MAT Á FYRRA NÁMI

Almennt 

Eingöngu er tekið við umsóknum um mat á fyrra háskólanámi frá nemendum sem fengið hafa inngöngu í nám við Listaháskóla Íslands.  

Sótt er um mat á fyrra námi með því að fylla út rafrænt eyðublað hér fyrir neðan.  

Umsóknir um mat á fyrra námi eru teknar fyrir tvisvar sinnum á skólaári, einu sinni á hverri önn.  

• Umsóknir sem berast fyrir 1. september eru að jafnaði afgreiddar í síðasta lagi 25. september. 

• Umsóknir sem berast fyrir 10. janúar eru að jafnaði afgreiddar í síðasta lagi 25. janúar.  

Ákvörðun matsnefndar er bindandi. Ef nemandi hefur athugasemdir við matið getur hann óskað eftir endurmati eða skýringum til matsnefndar, sérstaklega ef nýjar upplýsingar eða sjónarmið koma fram. Athugasemdir þurfa að koma fram innan 10 daga frá niðurstöðu matsnefndar.  

Mat á vegum deilda 

Námsráðgjafi heldur utan um mat á fyrra námi. Hver deild ber ábyrgð á matinu í samráði við námsráðgjafa. Í matsnefnd sitja deildarforseti, fagstjóri viðkomandi fagsviðs ásamt námsráðgjafa. Hægt er að kalla til verkefnastjóra kennslu. Til að stuðla að samræmi milli deilda byggist matið á viðmiðum hér fyrir neðan. Námsráðgjafi tekur á móti umsóknum og gengur formlega frá niðurstöðum matsnefnda. Deildarforseti staðfestir niðurstöðu matsnefndar með undirskrift á matsblaðið og sendir til námsráðgjafa sem gengur formlega frá matinu og sendir niðurstöðu til nemanda.  

Frágangur umsókna 

Til að matsnefnd geti afgreitt umsókn um mat á fyrra háskólanámi þarf umsókn að uppfylla eftirfarandi skilyrði:  

• Tilgreina skal þau námskeið sem nemandi telur jafngild sínu fyrra háskólanámi. 

• Í umsókn skal koma fram hvort áður hefur verið sótt um mat á sömu námsskeiðum við Listaháskólann eða aðra skóla. Ef svo er þarf úrskurður fyrra mats að fylgja umsókn.  

• Umsækjendur bera ábyrgð á því að allar ofangreindar upplýsingar komi fram í umsókn svo að hægt sé að afgreiða hana. Sé umsókn ekki fullnægjandi verður henni synjað á þeim forsendum.  

• Staðfest námsferilsyfirlit og námskeiðslýsingar frá viðkomandi háskóla úr kennsluskrá þess árs sem námskeið voru tekin þurfa að fylgja með umsókn. 

• Námsferilsgögn skulu vera á íslensku eða ensku.  

Afgreiðsla umsókna 

• Þegar umsókn hefur verið afgreidd fær nemandi tilkynningu í tölvupósti á LHÍ-netfang um niðurstöðu mats. Deildarforseti, fagstjóri og deildarfulltrúi fá einnig póst um niðurstöðu matsins og deildarfulltrúi gengur frá skráningu samkvæmt því á námsferil nemandans. Bæði umsókn og niðurstaða matsins er vistað við námsferil nemanda.  

Viðmið um mat 

• Einungis eru metin námskeið á háskólastigi úr viðurkenndum háskóla. Almennt gildir að annað nám en formlegt háskólanám er ekki heimilt að meta.  

• Fyrra nám er metið á móti heilu námskeiði, einingafjöldi (ECTS) þarf að vera sá sami eða meiri. 

• Sé óskað eftir því að fá skyldunámskeið metið þarf námskeiðið að vera fyllilega sambærilegt við námskeið sem umsækjandi á að taka við Listaháskólann.  

• Til að eiga möguleika á að fá námskeið metin þarf þeim að hafa verið lokið á síðastliðnum níu árum eða seinna. 

• Lokaverkefni og/eða lokaritgerð eru ekki metin. 

• Nemendur sem hefja meistaranám við Listaháskólann geta einungis fengið metin námskeið sem þeir hafa lokið á meistarastigi úr viðurkenndum háskóla.  

• Námskeið sem áður hefur gilt til prófgráðu úr öðrum viðurkenndum háskóla má mest nýta einu sinni til viðbótar til gráðu. 

Skráning á metnu námi í námsskráningarkerfi  

• Námsráðgjafi skilar yfirlitsskjali um metið nám til deildarfulltrúa 

• Deildarfulltrúi skráir metið nám í námskráningarkerfi skólans.  

Listaháskólinn getur metið nám á bakkalárstigi til allt að 90 eininga og allt að 60 eininga á meistarastigi. Í því felst að nemandi sem útskrifast frá Listháskóla Íslands hafi ekki tekið minna en helming náms síns við skólann.  

Umsækjendur um mat á fyrra námi geta ekki gengið út frá því að fallist verði á umsóknina og er því bent á að breyta ekki námskeiðsskráningu fyrr en niðurstaða liggur fyrir.  

SÉRTÆKUR STUÐNINGUR VEGNA VIÐBÓTARÞARFA Í NÁMI  

Mikilvægt er að sækja um sértækan stuðning tímanlega svo kennarar hafi tíma til að vinna úr beiðnum og geti mætt nemendum á sem bestan hátt.   

• Umsóknartímabil haustannar er opið frá upphafi annar til og með 1. október 

• Umsóknartímabil vorannar er opið frá upphafi annar til og með 1. mars 

Nemendur geta sótt um stuðning vegna viðbótarþarfa í námi vegna fatlana, sértækra námsörðugleika eða langvarandi veikinda. Stuðningurinn miðar að því að jafna stöðu og tækifæri til náms og felur á engan hátt í sér að dregið sé úr námskröfum (nemendur þurfa alltaf að uppfylla hæfniviðmið náms og/eða námskeiða).  

Námsráðgjöf hefur yfirumsjón með sértækum stuðningsúrræðum og býður upp á persónulega ráðgjöf og/eða eftirfylgni fyrir nemendur.  

Skilyrði fyrir sértækum stuðningi er að fyrir liggi staðfesting viðeigandi sérfræðings á fötlun, sértækum námsörðugleikum eða veikindum, m.a. en ekki bundið við, eftirfarandi: 

• Heyrnarskerðing og heyrnarleysi 

• Lesblinda og AD(H)D 

• Tourette og einhverfuróf 

• Hreyfihamlanir, hvort sem er langvarandi eða tímabundnar t.d. vegna veikinda eða slyss 

• Langavarandi veikindi, s.s. krabbamein, gigt, MS, MND eða geðfatlanir. 

Greiningar þurfa að vera frá viðurkenndum fagaðila á sama sviði og stuðningsþarfir nemandans liggja. Þær þurfa að vera á einstaklingsgrundvelli og ekki er tekið við hópgreiningum. Þá mega greiningar ekki vera eldri en frá því að nemandinn var í efri bekkjum grunnskóla. Tekið skal fram að Davis-greining nægir ekki til að fá sértækan stuðning þar sem hún er ekki greining á sértækum námsörðugleikum.  

Lesblinda 

Nemandi með lesblindu verður að framvísa greiningu frá sérfræðingi þar sem til að mynda er notast við einhverja af eftirfarandi aðferðum: 

• GRP 14 greiningarpróf (GRP 14H hópgreining dugar ekki ein og sér) 

• Aston Index lestrargreining 

• Logos dyslexiugreining 

• ICD 10 greiningarviðmið (notuð af sálfræðingum) 

Umsóknir um sértækan stuðning vegna viðbótarþarfa í námi 

• Nemandi byrjar á að fylla út umsókn um sértækan stuðning  vegna viðbótarþarfa í námi 

• Nemandi skilar einnig greiningu/vottorði með umsókninni 

• Í framhaldinu bókar nemandi viðtalstíma hjá námsráðgjafa 

• Námráðgjafi leggur mat á beiðnir nemenda sem sækja um sértækan stuðning 

• Námsráðgjafi staðfestir við fagstjóra að nemandi eigi rétt á sértækum stuðningu í námi en það er á ábyrgð nemanda að hafa samband við kennara/fagstjóra um útfærslu á stuðningum, t.d. aukinn tíma til verkefna- og prófaskila, lestraraðstoð, aðstoð við akademísk skrif, aðlögun námsumhverfis.  

Mikilvægt er að sækja um sértækan stuðning tímanlega svo kennarar hafi tíma til að vinna úr beiðnum og geti mætt nemendum á sem bestan hátt.   

• Umsóknartímabil haustannar er opið frá upphafi annar til og með 1. október 

• Umsóknartímabil vorannar er opið frá upphafi annar til og með 1. mars 

Hægt er að sækja um undanþágu ef veikindi eða slys koma upp á öðrum tímum. Þá þarf alltaf að skila inn læknisvottorði.   

Þau sem glíma við hamlanir sem líta má á sem tímabundnar og hægt er að vinna með, lækna eða gera viðráðanlegri, sækja um sértækan stuðning fyrir hverja önn eða fyrir skólaárið. Ef hömlum nemanda er varanleg, þá sækir nemandinn um sértækan stuðning í upphafi náms og er skráður með stuðningi út námstímann við LHÍ.  

UPPLÝSINGAR UM RAFRÆN VERKFÆRI

Hljóðbókasafn 

Nemendur með lesblindu og öll sem ekki geta nýtt sér prentað mál, hafa aðgang að talgervli hjá Hljóðbókasafninu. Talgervillinn er nemendum að kostnaðarlausu.  

Hvað þarf að gera:  

Viðkomandi þarf að vera skráður hjá Hljóðbókasafni Íslands, hbs.is, sem sendir staðfestingu varðandi greiningu til Blindrafélagsins. Nemandinn fær þá sendan hlekk fyrir niðurhali á talgervli og lykil fyrir raddir. Fyrirspurnir varðandi talgervil sendist á afgreidsla@blind.is. 

• Námsefni á tölvutæku formi: Hljóðbókasafn Íslands, hbs.is, er í samstarfi við erlend rafræn bókasöfn. Þegar leitað er eftir námsefni hjá Hlóðbókasafninu í fyrsta skipti þarf nemandinn að sækja um aðgang (https://hbs.is/leidbeiningar/hverjir-geta-ordid-lanthegar). Tengiliður er Hafþór Ragnarsson, hafthor@hbs.is og veitir hann allar upplýsingar og ráðgjöf. 

Talgervill í Canvas  

Í Canvas námsumsjónavef hvers námskeiðs er innstilltur talgervill sem nemendur geta notað sér til aðstoðar. Hnappur birtist efst í hægra horni hvers námskeiðs merktur Aðgengilegt lestrarumhverfi/Immersive reader. 

• Í OneNote er hægt að hlaða upp skjölum, t.d. PDF og Word, og láta talgervil lesa textann úr skjölunum. Hægt er að sjá leiðbeiningar hér: https://support.microsoft.com/en-au/topic/use-immersive-reader-for-onenote-10712138-b4ed-4513-958d-d9a1b3038170 

Atlas Primer er talþjónn sem er ætlað að gera námsumhverfi sveigjanlegra. Nánari upplýsingar er að finna hjá Atlas Primer (https://www.atlasprimer.com/). 

Á Snjallvefjunni er hægt að finna fróðleik, tæknileg verkfæri og snjalltæki (https://www.snjallvefjan.is/). 

Með Natural Reader er hægt að breyta texta, PDF skjölum og fleiri sniðmátum í talmál (https://www.naturalreaders.com/). 

Miðeind er vefsíða fyrir máltækni og gervigreind https://mideind.is/is.