Umsóknarferli

Umsókn um nám í Listaháskóla Íslands er á rafrænu formi.
 
Umsóknarferlið er í tveimur skrefum, í fyrra skrefinu er umsóknin fyllt út, umsóknargjald borgað og sótt um. Í síðara skrefinu fá umsækjendur staðfestingu á því að LHÍ hafi móttekið umsóknina. Hægt er að vista umsókn á meðan verið er að vinna í henni. Athugið að ljósmynd þarf að fylgja umsókninni.
 
Skila þarf möppu á skrifstofu viðkomandi deildar eða senda í pósti  og skal þá póstlögð eigi síðar en auglýstur frestur rennur út.
 

Umsókn

Til að umsókn sé fullgild þarf að borga umsóknargjald og eftirfarandi gögn þurfa að berast Listaháskólanum:
 
  1. Prófskírteini (ljósrit gildir ekki)
  1. Skannið frumrit  af prófskírteinum og hengið við umsókn,
    eða
  2. fáið staðfest afrit af prófskírteinum með stimpli frá viðkomandi skóla, skannið og hengið við umsókn.
 
  1. Ferilmappa (portfolio)
Umsækjendur skulu safna sýnishornum af verkum sínum saman í möppu (portfolio), á pappírsformi. Mappan skal vera í stærð A4 eða A3. Hún skal innihalda allt að 30 greinargóðar ljósmyndir, tölvuprent eða annarskonar afrit af verkum umsækjanda. Með þeim skal fylgja greinagóð lýsing þar sem fram koma upplýsingar eins og: titill, stærð, efni, ártal o.s.frv. Video- og hljóðverkum má skila á USB-lykli eða á DVD-disk.
 
Möppunni má deila í tvo hluta:
  • Undirstöðugreinar - Verk sem sýna almenna teiknikunnáttu, myndbyggingu og litanotkun ásamt þrívíddarverkum sem sýna myndbyggingu, formfræði og efnisnotkun.
  • Sjálfstæð verk - Myndverk, hljóðverk, texti, hönnun o.s.frv., unnin í hvaða efni sem er, sem sýna persónulega sköpun umsækjanda. Hér er átt við verk sem umsækjandi hefur gert út frá eigin forsendum. Verkin þurfa ekki að vera fullgerð eða útfærð til hins ítrasta. Þvert á móti er mikilvægt að þar sé einnig að finna hvers konar skissur og teikningar, ljósmyndir, texta, myndbönd og hljóðverk. Í raun rúmast allt innan möppunnar sem að mati umsækjanda getur með einum eða öðrum hætti lýst því sem hann vill ná fram með myndlistarvinnu sinni og getur vitnað til um hvort hann hefur hæfileika til að koma því á framfæri við aðra. Í sumum tilvikum getur verið gott að láta stuttan texta um verkin fylgja með.

 
Mappan er metin nafnlaus en hún skal vera merkt með umsóknarnúmerinu sem umsækjandi fær þegar hann sækir um á vef skólans. Möppur skulu sóttar aftur á skrifstofu skólans á Laugarnesveg 91 samkvæmt auglýstum fresti. Ósóttar möppur verða ekki geymdar og áskilur skólinn sér rétt til að eyða þeim.
 

Inntökuferli

 
Í inntökunefnd sitja þrír fastráðnir kennarar deildarinnar, einn utanaðkomandi myndlistarmaður eða listfræðingur auk deildarforseta, sem er formaður. Inntökunefndin velur nemendur úr hópi umsækjenda sem talið er að hafa forsendur til að stunda nám við myndlistardeild og standast þær kröfur sem gerðar eru í listnámi á háskólastigi. Inntökunefndin hefur að leiðarljósi að viðkomandi geti sem best nýtt sér það nám sem í boði er og því skal ekki túlka mat hennar sem einhlítan úrskurð um hæfni umsækjandans til listsköpunar yfirleitt.
 
Inntökuferlið er í eftirfarandi þrepum:
  • Umsóknir eru metnar með tilliti til almennra og sérstakra inntökuskilyrða og inntökunefnd fer yfir innsend verk. Umsækjendur sem standast mat inntökunefndar komast í úrtakshóp.
  • Þeim sem komast í úrtakshóp er boðið í viðtal. Umsækjendur komi með 1-2 verk með sér ásamt skissubók.
  • Öllum umsækjendum verður sent skriflegt svar við umsóknum í maí. Þeir umsækjendur sem fá boð um skólavist þurfa að staðfesta á skrifstofu deildarinnar fyrir maílok hvort þeir hyggist taka því og greiða staðfestingargjald. Gjaldið er óafturkræft en gengur upp í skólagjöld mæti viðkomandi í námið um haustið.
  • Úrskurður inntökunefndarinnar er endanlegur og henni er ekki skylt að gefa nánari skýringar á úrskurði sínum.
 

Viðtal

 
Þeim sem komast í úrtakshóp er boðið í viðtal. Viðtalið hefur þann tilgang að kanna almennan áhuga umsækjenda á tilvonandi námi, afstöðu þeirra og viðhorf til myndlistar og hugmyndir að baki verkum þeirra. Í viðtalið ber umsækjendum að koma með eitt til tvö sýnishorn af verkum sínum ásamt skissubók. Verkin geta verið fullkláruð eða í vinnslu og unnin í hverskonar miðil. Umsækjandi má gera ráð fyrir því að þurfa að tjá sig um þau verk sem hann hefur sent inn. Umsækjendur sem staddir eru erlendis eða geta ekki mætt í viðtal, þurfa að vera reiðubúnir að eiga símaviðtal við inntökunefnd.
 
 

Inntökuskilyrði

 
Miðað er við að umsækjendur hafi lokið stúdentsprófi eða sambærilegu námi. Æskilegt er að umsækjendur hafi sótt undirbúningsnám frá hönnunar- eða myndlistardeildum framhaldsskólanna, en slíkt er þó ekki skilyrði.
 

Undanþágur vegna inntöku

 
Listaháskólanum er heimilt að veita inngöngu í skólann umsækjendum sem búa yfir þekkingu og reynslu sem telst fullnægjandi undirbúningur til bakkalárnáms við skólann. Þó er við það miðað að umsækjendur hafi lokið eigi færri en 105 einingum úr eldra kerfi framhaldsskólastigsins eða 150 framhaldsskólaeiningum samkvæmt nýja kerfinu.
 
 
 

 

MIKILVÆGAR UPPLÝSINGAR

Umsóknarfrestur: 9. apríl 2018

Viðtöl: 25. - 27. apríl 2018

Umsóknum svarað: Maí 2018

Upphaf haustannar: 20. ágúst 2018

Umsóknargjald: 5000 kr.

 

HAFA SAMBAND

Edda Kristín Sigurjónsdóttir deildarfulltrúi myndlistardeildar

 

FLÝTILEIÐIR

Rafræn umsókn

Skólagjöld

Myndlistardeild