Automatic translation by Google Translate.We cannot guarantee that it is accurate.
Skoða vefinn á Íslensku
Í tilefni þess að Misbrigði, samstarfsverkefni fatahönnunarbrautar Listaháskóla Íslands og Fatasöfnunar Rauða krossins, fer fram í tíunda skipti í ár verður blásið til hátíðar í Norræna húsinu og Grósku dagana 22.-24. nóvember, með málþingi, sýningum og vinnusmiðjum.
Annars árs nemendur fatahönnunarbrautar hafa í tíu ár hannað fatalínu sem eingöngu er unnin úr ósöluhæfum fatnaði og textíl sem safnast í Fatasöfnun Rauða krossins. Afrakstur námskeiðsins hefur verið sýndur á tískusýningu, í innsetningu og á tískuljósmyndum ár hvert og nú er tilefni til að fagna því.
Föstudaginn 22. nóvember kl. 12.30-16 verður af þessu tilefni haldið málþing í Norræna húsinu sem ber yfirskriftina “Tíska og umhverfi”. Að málþinginu standa fatahönnunarbraut Listaháskóla Íslands, Fatasöfnun Rauða krossins og Umhverfisstofnun.
Viðfangsefni málþingsins er staða tísku og fatahönnunar á Íslandi í dag, umhverfisáhrif fataiðnaðarins og hringrás textíls. Meðal mælenda á dagskrá eru fatahönnuðir, framleiðendur, og kennarar innan fagsins. Dagskrá verður send út þegar nær dregur.
Að dagskrá lokinni verður formleg opnun yfirlitssýningarinnar “Misbrigði í tíu ár” í anddyri Norræna hússins og í framhaldinu opnar sýning með innsetningum núverandi annars árs nemenda í Grósku.
