Vigdís Gunnarsdóttir ráðin í stöðu lektors við listkennsludeild LHÍ 

Vigdís Gunnarsdóttir hefur verið ráðin í stöðu lektors við listkennsludeild, á sviði akademískrar þróunar, frá haustönn 2023. Hún mun gegna hlutverki fagstjóra í listkennslufræðum með áherslu á sviðslistir.

Vigdís lauk diplóma í listkennslufræðum frá Listaháskóla Íslands árið 2013. Hún hlaut MA gráðu í skrifum og leikstjórn fyrir sjónvarp frá Goldsmiths Collage, University of London í Bretlandi árið 2002 og lauk námi í leiklist frá Leiklistaskóla Íslands árið 1993. Vigdís var fastráðinn leikari við Þjóðleikhúsið frá 1995 – 2003 og lék ýmiss hlutverk í Borgarleikhúsinu á árunum 2009 – 2010. Hún hefur jafnframt reynslu af handritsgerð fyrir sjónvarpsþáttaraðir, heimildarmynd, söngleik og eitt barnaleikrit, Thalía. Vigdís hefur umtalsverða kennslureynslu á háskólastigi, stefnumótun og þróun náms og kennslu í kennslufræðum með áherslu á sviðslistir.  Auk þess hefur hún reynslu af listkennslu á grunn- og framhaldsskólastigi. Hún hefur starfað sem aðjúnkt og fagstjóri meistaranáms við listkennsludeild frá 2018 og leiðbeint í lokaverkefnum nemenda auk þess að taka þátt í  þróunarverkefni og samstarfi listkennsludeildar og Háskólans á Akureyri „Listir og sköpun í skólastarfi“ og verkefninu „Listalestin“ sem eru vinnusmiðjur nemenda listkennsludeildar sem fram fara í grunnskólum utan höfðuborgarsvæðisins í samstarfi við List fyrir alla.

Samfélagslistir og samfélagsleikhús er Vigdísi hugleikið og kjarnast í þeirri sýn hennar að leiklist sé kjörin vettvangur til að valdefla ungmenni og byggja undir hæfni þeirra til að tjáningar, miðlunar eigin hugmynda, sjálfstæðis og ábyrgðar í samfélaginu. Í háskólakennslu sinni hefur hún lagt áherslu á að kynna nemendum sínum fjölbreytta kennsluhætti og þverfaglega nálgun í kennslu með aðferðum listanna.